මෙරට ප්‍රමුඛ පෙළේ විද්‍යුත් මාධ්‍ය ජාලයක් විසින් ඉතා සූක්ෂම අන්දමින් මෙම ජාවාරම ක්‍රියාත්මක කරන බව 'දෙරණ' අනාවරණය කරයි.
එම කුප්‍රකට මාධ්‍ය ජාලය, දේශීය සහ විදේශීය ආයෝජකයින්ගේ රටට හිතකර ව්‍යාපෘති නිර්දය ලෙස විවේචනය කරමින්, ඒවා රටට අයහපත් ව්‍යාපෘති යැයි මවාපා දේශීය සහ විදේශීය ආයෝජකයින් මුලින්ම බිය වද්දන බවත්, එසේ බිය වැද්දීමෙන් අනතුරුව තම මාධ්‍ය අවභාවිතය හරහා ඔවුන් අදාළ ව්‍යාපෘතිවල ප්‍රතිරූපය ඉහළ දැමීමට පොරොන්දු වෙමින්, ඒවා ප්‍රවර්ධනය කිරීම සඳහා කප්පම් ලබා ගැනීමේ නවතම මාධ්‍ය කලාවක් අනුගමනය කරමින් සිටින බවත් 'දෙරණ' කියා සිටියි.
ඒ පිළිබඳව සියලු තොරතුරු නුදුරු දිනකදීම ශ්‍රී ලාංකීය ජනතාවට හෙළි කිරීමට 'දෙරණ' සුදානම් වේ.
....................
දෙරණ මේ කියනේ සිරස ගැනය. මේ කියන ව්‍යාපෘතිය කොළඹ වරාය නගරයය. මේක කෙලින් කියන්න බැරි 'දෙරණ' ගේම ඉල්ලන්නේ ස්ටිකරයක් නල්ලේ අලෝගත් ඔලුබක්කෙකුගෙන්ද ?යන්න අපට අසන්නට සිදුවේ.
දෙරණ නාලිකාවේ හිමිකරුවකු වන දිලිත් ජයවීරට එරෙහිව කොටස් වෙළඳපොළ වූ දුෂිත ගනුදෙනු සම්බන්ධයෙන් චෝදනා එල්ල වී තිබේ. මේක සිරසට අනුව ලෝකයේ ලොකුම අපරාධයය.
පසුගියද කොළඹ කො‍ටුවේ ඉඩම් පළහිලව්වකටද මේ දෙගොල්ලෝ තුන්වෙනි ලෝක යුද්ධය පටන් ගත්තා වැනි මහා මාධ්‍ය යුද්ධයක් ද කළේය. මේකට හිරු නාලිකාවද පැටළුනේය.
කොහොම උනත් මේ කවුරුත් පසුගිය රාජපක්ෂ ආණ්ඩුවෙන් වරප්‍රසාද ගනිමින් ඒ අාණ්ඩුව වෙනුවෙන් කටයුතු කළ ආයතන වේ. මේ මොහොතේත් ඔවුන් සේවය කරන්නේ ඒ දූෂිත පාලනය නැවත ගෙන ඒම වෙනුවෙනි. මන්ද ඔවුන්ගේ ම්ලෙච්ඡ ව්‍යාපාරික අරමුණු ඉෂ්ඨ කර ගැනීම එවැනි දූෂිත පාලනයකදී පහසු බැවිනි. මෙහිදී සිරස ඉතා දුෂ්ඨ හා නරුම මාධ්‍ය භාවිතාවක යෙදෙමින් සිටී. පසුගිය ජනාධිපතිවරණයේදී රාජපක්ෂලාගේ පරාජය සහතික බව දැන ගැනීම නිසා මෛත්‍රීපාල සිරිසේන මහතාට සහය දක්වන ප්‍රතිපත්තියකට මාරු විය. මේ මොහොතේත් සිරස පාවිච්චි වෙන්නේ තමන්ගේ ප‍ටු දේශපාලන වුවමනාවන් වෙනුවෙනි. දෙරණ හා හිරු නාලිකා දෙකද සිරස තරම් නරුම තනකට වැටී නැතත් තම ඇත්ත අපේක්ෂාව කුමක්ද යන්න වසන් නොකරයි.
දැන් දෙරණ සිරසේ කුණු හොයන තරමට සිරසද දෙරණේ කුණු සොයනු ඇත.හෙට අනිද්දාට මාධ්‍ය ලෝකයම මේ කුණු ගන්දස්කාරයෙන් පිරීයනු ඇත.
