එමෙන්ම ව්‍යවස්ථාදායක සභාව පිළිබඳ විවාදය පැත්තකට දමා මුදල් අමාත්‍ය රවි කරුණානායක මහතාට එරෙහි විශ්වාසභංග යෝජනාව අද විවාදයට ගන්නා ලෙස බලකර සිටීමටද විපක්ෂයේ මෙම මන්ත්‍රීවරුන් තීරණය කර ඇත.
ඒ අනුව විපක්ෂයේ මන්ත්‍රීවරුන්ගේ අනුමැතිය හා දැනුවත් කිරීමෙන් තොරව ව්‍යවස්ථාදායක සභාවට සිවිල් වැසියන් තිදෙනා පත් කිරීම මෙන්ම අමාත්‍යවරුන් නොවන පාර්ලිමේන්තු මන්ත්‍රීවරුන් ව්‍යවස්ථාදායක සභාවට පත් කළ යුතු වුවත් එම සභාවට අමාත්‍යවරුන් දෙදෙනකු පත් කිරීම තුළින් කර ඇති වරදට විරුද්ධ පක්ෂයේ මන්ත්‍රීවරු විරෝධය පෑමට නියමිතය.
ආණ්ඩුවට සහාය නොදෙන ශ්‍රී ලංකා නිදහස් පක්ෂයේ මන්ත්‍රීවරුන් සහ අනෙකුත් පක්ෂවල මන්ත්‍රීවරුන් මෙම විරෝධතාව දැක්වීමට එකඟතාව පළ කර ඇත.
මේ අතර සියලු පක්ෂවලින් විමසා ව්‍යස්ථාදායක සභාවට සාමාජිකයන් පත් කළ යුතු බවට වන නියමය ඒ ආකාරයෙන් ක්‍රියාත්මක නොවූ නිසා මෙම විරෝධතාව දැක්වීම සුදුසු බව විපක්ෂ නායක නිමල් සිරිපාල ද සිල්වා මහතා පෙරේදා (01) රැස්වූ විපක්ෂයේ පක්ෂ නායක රැස්වීමේදී සඳහන් කළ බව ප්‍රජාතන්ත්‍රවාදී වාමාංශික පෙරමුණේ නායක වාසුදේව නානායක්කාර මහතා ප්‍රකාශ කළේය.
ව්‍යවස්ථාදායක සභාව සම්බන්ධ විවාදයට පෙර මුදල් අමාත්‍ය රවි කරුණානායක මහතාට එරෙහිව වන විශ්වාසභංග යෝජනාව පාර්ලිමේන්තුවට භාර දුන් හෙයින් එම විවාදයට ප්‍රමුඛතාවක් දිය යුතු බවත් ඒ අනුව එය අද විවාදයට ගැනීමට විපක්ෂයේ මන්ත්‍රීවරුන් බලකර සිටින බවත් ඒ මහතා සඳහන් කළේය.
