අධිකරණ අමාත්‍ය විජයදාස රාජපක්ෂ මහතා ප්‍රකාශ කර සිටින්නේ අල්ලස් කොමිසමේ සාමාජිකයකු ඉල්ලා අස්වීම එහි කටයුතු අඩපණ කිරීමේ අරමුණෙන් සිදුකළ එකක් විය හැකි වූවත් මේ වනවිටත් එම කොමිසමේ කටයුතු හොඳින් කරගෙන යන බව අනාවරණය වී ඇත.
එහෙත් කොමිසමේ සභාපතිවරයා සහ සෙසු සාමාජිකයන් දෙදෙනා විමර්ශන අවසන් වූ පැමිණිලිවලට නඩු පැවරීම සඳහා අනුමැතිය ලබාදිය යුතු වේ. තවද අලුතින් විභාග කිරීමට කොමිසමට ලැබෙන පැමිණිලි විභාග කිරීම සඳහා ද කොමිසමේ සාමාජිකයන්ගේ අනුමැතිය අවශ්‍ය වේ.
කොමිසමේ සභාපතිවරයා සහ සෙසු සාමාජිකයන් ඒ සඳහා නොසැලකිලිමත්භාවයක් පෙන්වන්නේ නම් ඒ හරහා කොමිසමේ කටයුතු අඩපණ කිරීම ඔවුන්ගේ අරමුණ විය හැකි බවද මෙහිදී රජයේ අවධානයට යොමුව තිබේ.
කොමිසමේ සභාපතිවරයාට සහ සෙසු සාමාජිකයන්ට එම තනතුරු වෙනුවෙන් මාසික වැටුප සහ ඊට අදාළ වෙනත් දීමනා ද සහිතව රුපියල් ලක්ෂයක පමණ වැටුපක් මසකට ලබාදෙයි. එවැනි වැටුප් ද ලබා ගනිමින් තමන්ගේ වගකීම හරි හැටි ඉෂ්ට නොකිරීම ඔවුන් විසින් රජයට සිදුකරන විශාල හානියකි. පසුගිය කාලයේ අල්ලස් කොමිසමට හිටපු මැති ඇමැතිවරුන් 21ක් සම්බන්ධයෙන් ලැබී තිබූ අල්ලස් හෝ දූෂණ වංචා වත්කම් පැමිණිලි විභාග නොකර යට ගසා ඇති බවට ද කරුණු අනාවරණය වී ඇත.
dinamina
