සෞඛ්‍ය බලධාරීන්ගෙන් කෙනෙහිලිකම් සිදුවන බවට චෝදනා කරමින් විශේෂඥ ශල්‍ය වෛද්‍යවරයා පසුගිය මැයි 12 වැනි දින සිට සියලු හදවත් සැත්කම් නවතා දමා අැත. 2003 දී නාමල් ගමගේ වෛද්‍යවරයාගේ ප්‍රධානත්වයෙන් ආරම්භ කරන ලද කරාපිටිය රෝහලේ හෘද සැත්කම් ඒකකයේ ශල්‍යාගාරය වෙනත් සැත්කම් සඳහාද ලබාදීමට රෝහල් බලධාරීන් ක්‍රියාකිරීම මේ අර්බුදයට මුල් වී තිබේ.
මතුව තිබෙන අර්බුදය පිළිබඳ විමසා බැලීම පිණිස අජිත් කුමාර සහ වෛද්‍ය රොමේෂ් පතිරණ යන ගාල්ල දිස්ත්‍රික් පාර්ලිමේන්තු මන්ත්‍රීවරුන් පසුගිය සිකුරාදා කරාපිටිය රෝහලේ සංචාරයක නිරත වූ අවස්ථාවේ අදහස් දැක්වූ විශේෂඥ වෛද්‍යවරයා පවසා අැත්තේ ලොව පුරා බොහෝ රටවල වැඩියෙන්ම රෝගීන් මියයන්නේ හෘදය රෝග හේතුවෙන් බවය. එය නොසලකා කරාපිටිය රෝහල් බලධාරීන් ක්‍රියාකරන ආකාරය වෛද්‍ය නාමල් ගමගේ හඳුන්වා දුන්නේ 'හිතක් පපුවක් නොමැති පිළිවෙතක්' ලෙසින්.
මෙම අර්බුදයේදී නිහඬ පිළිවෙතක් අනුගමනය කරන බවට විශේෂඥ වෛද්‍යවරයා සෞඛ්‍ය අමාත්‍යවරයා ඇතුළු සෞඛ්‍ය බලධාරීන්ට චෝදනා කළේය.
"සෞඛ්‍ය ඇමතිතුමෙක් ඉන්නවා නම් ඉස්සෙල්ල හොයන්න ඕන වැඩියෙන් මැරෙන්නේ මොනවයින්ද කියලා," ඔහු පැවසීය.
මෑතක් වනතුරු මසකට ශල්‍යකර්ම 50-60 ක පමණ සිදු කළ විශේෂඥ වෛද්‍ය නාමල් ගමගේ සම්මානලාභී වෛද්‍යවරයෙක්. විශේෂඥ වෛද්‍යවරයා ඉවත්වීමෙන් අනතුරුව ගතව ගිය මාසයක පමණ කාලය තුල එම ශල්‍යාගාරයේ සිදුකොට තිබෙන්නේ සැත්කම් අටක් පමණි.
සතියේ දින කිහිපයක් ශල්‍යාගාරය ඔහුගෙන් ඉවත් කොට වෙනත් වෛද්‍යවරුන්ට ලබාදී තිබුනත් පසුගිය සිකුරාදා මන්ත්‍රීවරුන් සංචාරය කළ අවස්ථාවේ ශල්‍යාගාරය ඉබි යතුරු දමා වසා දමා තිබුණි.
එහිදී අදහස් දැක්වූ රොමේෂ් පතිරණ මන්ත්‍රීවරයා, අනෙක් ශල්‍ය වෛද්‍යවරුන්ටද අවස්ථාව ලබාදීම පිණිස ශල්‍යාගාරයේ කාලය වෙන්කිරීමට සිදු වූ බව රෝහලේ අධ්‍යක්ෂ වෛද්‍ය ෂෙල්ටන් පෙරේරා තමන් කළ විමසීමකදී සඳහන් කළ බව කියා සිටියේය.
පාලුවට ගිය අධි සත්කාර ඒකකය
සැත්කම් යළි ආරම්භ කිරීම පිණිස විශේෂඥ වෛද්‍යවරයාට සියලු පහසුකම් සපයා දෙන මෙන් ඉල්ලා සිටිමින් පසුගිය දිනවල ප්‍රදේශවාසීහු උද්ඝෝෂණවලද නිරතව සිටියහ.
(BBC අැසුරින්)
