එය පස්වරු 6ට ජනාධිපති ලේකම් කාර්යාලයේදී පැවැත්වෙනු ඇති බව වාර්තා වේ. දැනට කැබිනට් මණ්ඩලයට ඉදිරිපත් කර ඇති 20 වන ආණ්ඩුක්‍රම ව්‍යවස්ථා සංශෝධනය සඳහා අවසන් අනුමැතිය ලබා ගැනීම මෙම විශේෂ කැබිනට් රැස්වීමේදී සිදුකිරීමට නියමිත බව පැවසේ.

20 වන ආණ්ඩුක්‍රම ව්‍යවස්ථා සංශෝධනය සම්බන්ධයෙන් වන කැබිනට් පත්‍රිකාව ජනාධිපතිවරයා විසින් කැබිනට් මණ්ඩලයට ඉදිරිපත් කරනු ලැබුවේ පසුගිය මැයි මස 13 වැනි දිනය.

එහිදී දේශපාලන පක්ෂවලින් ඉදිරිපත්ව ඇති යෝජනා සැලකිල්ලට ගෙන අවසන් වාර්තාවක් සැකසීම සඳහා අමාත්‍යවරුන් 9 දෙනෙකුගෙන් යුත් කැබිනට් අනු කමිටුවක් ද පත් කරනු ලැබුවේය.

අද පැවැත්වෙන විශේෂ කැබිනට් රැස්වීමේදී 20 වන ව්‍යවස්ථා සංශෝධනය සඳහා අනුමැතිය හිමිවුවහොත් ඉදිරි දින කිහිපය ඇතුළත එය පාර්ලිමේන්තුවට ඉදිරිපත් කිරීමට නියමිත බවත් රජයේ ආරංචි මාර්ග වැඩිදුරටත් සදහන් කරයි.