අගමැතිට එරෙහි විශ්වාසභංග යෝජනාව පසුගිය සිකුරාදා මන්ත්‍රීවරු 112 ගේ අත්සනින් යුතුව පාර්ලිමේන්තු ලේකම් ධම්මික දසනායක මහතාට බාරදෙන ලදී. එය බහුතර ඡන්දයෙන් අනුමත වුවහොත් කැබිනට් මණ්ඩලය නිතැතින්ම විසුරුවා හැරේ.
එසේ සිදු වුවහොත් පාර්ලිමේන්තුවේ බහුතර කැමැත්තකින් යුතු අගමැතිවරයෙක් පත්කරගැනීමට ජනාධිපතිවරයාට සිදු වේ. නමුත් වාර්තා වෙන පරිදි මෙම විශ්වාසභංගය පාර්ලිමේන්තු කටයුත්තක් ලෙස පිළිගැනීමට ජනාධිපතිවරයාගේ කැමැත්තක් නොමැත.
කෙසේවෙතත් ජනාධිපති මෛත්‍රීපාල සිරිසේනගේ ප්‍රධානත්වයෙන් ආණ්ඩුක්රම ව්‍යවස්ථාවේ යෝජිත විසිවැනි සංශෝධනය පිළිබඳ සාකච්ඡා කෙරෙන තීරණාත්මක කැබිනට් රැස්වීමක් අද (08) පස්වරුවේ කැඳවා තිබේ. දැනට කැබිනට් මණ්ඩලයට ඉදිරිපත් කර ඇති 20 වන ආණ්ඩුක්රම ව්‍යවස්ථා සංශෝධනය සඳහා අවසන් අනුමැතිය ලබා ගැනීම මෙම විශේෂ කැබිනට් රැස්වීමේදී සිදුකිරීමට නියමිත බව වාර්තා වේ.
