දැනට කැබිනට් අනුමැතිය හිමි වූ 20 වැනි සංශෝධනයේ සඳහන් මැතිවරණ කොට්ඨාස 125 වෙනුවට එය වෙනස් කර ගැනීමට හැකියාව තිබෙන බව ඊයේ(11) පැවැති මාධ්‍ය හමුවකදී කැබිනට් ප්‍රකාශක රාජිත සේනාරත්න අමාත්‍යවරයා පැවසීය. කෙසේ වෙතත් අවසන් 20 වැනි සංශෝධනය අද දිනයේදී ගැසට් කිරීමට රජය බලාපොරොත්තු වේ.

නව මැතිවරණ ක්‍රමයක් හඳුන්වාදීම සඳහා නව යෝජනාවක් පසුගිය සඳුදා දිනයේ රැස්වූ කැබිනට් මණ්ඩලයට අග්‍රාමාත්‍ය රනිල් වික්‍රමසිංහ මහතා විසින් ඉදිරිපත් කරනු ලැබුවේය.

කොට්ඨාස ක්‍රමය යටතේ මන්ත්‍රීවරුන් 125 දෙනෙකු, සමානුපාතික ක්‍රමය යටතේ 75 දෙනෙකු සහ ජාතික ලැයිස්තුවෙන් මන්ත්‍රීවරුන් 25 දෙනෙකු ඇතුළත්ව මන්ත්‍රීවරුන් 225 දෙනෙකු තෝරා ගැනිම එමඟින් යෝජනාවී තිබුණි.

කෙසේ වෙතත් මෙම නව ක්‍රමයට ඇතැම් පක්ෂ විරෝධය පළ කරන අතර, ඇතැම් පක්ෂ ඊට සංශෝධනද ඉදිරිපත් කර ඇත.

නව මැතිවරණ ක්‍රමය සම්බන්ධයෙන් යෝජනා වී ඇති සියලු කරුණු සැලකිල්ලට ගනිමින් අද දිනයේ රැස්වන කැබිනට් මණ්ඩලයේදී අවසන් එකඟතාවයකට පැමිණිමට නියමිතය.

කැබිනට් මණ්ඩලයේදී 20 වන ව්‍යවස්ථා සංශෝධනයට අනුමැතිය හිමිවුවහොත් එය අද දිනයේම ගැසට් කිරීමට බලාපොරොත්තු වන බව අමාත්‍ය රාජිත සේනාරත්න මහතා සඳහන් කළේය.