රාජපක්ෂ රෙජිමයේ වංචා දූෂණ පිළිබදව ජනතාවට අනාවරණය වූයේ ඉතා ස්වල්පයක් බවත් අද සිට ඉදිරියට සිට එජාපය මගින් මෙම හෙළිදරව්ව නම් තේමාවෙන් පසුගිය රාජපක්ෂ ආණ්ඩුවේ වංචා දූෂණ හෙළිකිරීම සිදු කරන බවත් ඔහු පැවසුවේය.
බැසිල් රාජපක්ෂ හිටපු අමාත්‍යවරයා ශ්‍රී ලංකා සංචාරක සංවර්ධන අධිකාරියේ,ශ්‍රී ලංකා සංචාරක ප්‍රවර්ධන අධිකාරියේ මුදල් රුපියල් ලක්ෂ පන්සිය හැත්තෑවක් සංචාරක සුභසාධන සංගමයට යොදවා එම මුදල් දේශපාලන ප්‍රචාරක කටයුතු සදහා භාවිතා කර ඇති බව පැවසුවේය.
බැසිල් රාජපක්ෂට බන්ධනාගාර ගත වීමට සිදුවූයේ දිවිනැගුම හරහා ජනතාවට සහන සැලසීමට ගොසින් බව හිටපු ජනාධිපතිවරයා පැවසූවත් ඔහුගේ ඔවුන්ගේ මෙම ක්‍රියාකලාපය හරහා පැහැදිලිවම එය අසත්‍යයක් බව තහවුරු වන බවත් මෙම මුදල් යොදවා ඇත්තේ ජනතාව ගැන නොසිතා දේශපාලනය මගින් පවුල් බලය තහවුරු කර ගැනීමට බව කීවේය.
පසුගිය සමයේ හිටපු ජනාධිපතිවරයාගේ ප්‍රතිරූපය නැංවීම සදහා 'සොලූෂන් ග්රූප් 'නම් ප්‍රචාරක ආයතනයට රුපියල් ලක්ෂ 423ක් ගෙවා ඇති අතර ද 'ප්‍රස්ට් මීඩියා සොලූෂන්' ආයතනයට රුපියල් ලක්ෂ 570 ක් ගෙවා ඇත.එසේම දේශපාලන ප්‍රචාරක කටයුතු සදහා රූපවාහිනී නාලිකාවකට රුපියල් ලක්ෂ 40ක් ගෙවා ඇත.මේ සියලුදේ සදහා මුදල් ගෙවා අත්තේ සංචාරක ප්‍රවර්ධන අධිකාරිය මගිනි.
මේ අතරම දේශපාලන රැස්වීම් සදහා භික්ෂූන් වහන්සේලා ගෙන්වීමට රුපියල් ලක්ෂ 50 ක් වැය කර ඇති බවත්,අමාත්‍යවරයාගේ ගම්පහ ඔරුතොට පාරේ නිවසෙහි දිවා රාත්‍රී ආහාර සැපයීම් සහ අනෙකුත් පහසුකම් සදහා රුපියල් ලක්ෂ 1050 ක් ගෙවා ඇත්තේද සංචාරක අමාත්‍යාංශය හරහාය.
සංචාරක ඇමතිවශයෙන් සංචාරක ව්‍යාපාරය සදහා කිසිදු මුදලක් වැය නොකර ඒ මුදල් පවුල් දේශපාලනය සදහා වැය කරමින් කටයුතු කළ ආකාරය මෙය බවත් මෙය මහජන මුදල් අවභාවිතයක් බවත් සදහන් කළේය.
ඌව පළාත් සභාවේ මැතිවරණයට මහ ඇමති අපේක්ෂක ලෙස ඉදිරිපත් වූ ශෂේන්ද්‍ර රාජපක්ෂ දිනවීම පවුල් බලය රැක ගැනීමේ වැදගත් පියවරක් වූ නිසා ඒ වෙනුවෙන් දැවැන්ත ප්‍රචාරනයක් ගෙන ගිය බවත් ඒ සදහා මුදල් වියදම් කළේද සංචාරක මණ්ඩලය ඇතුළු ආයතන වලින් බව පැවසුවේය.
මෙම රජයේ ආයතනවල මුදල් රාජපක්ෂ පවුලේ උදවිය විසින් හිතුමතේ වියදම් කළේ කෙසේද ? යන්න පිළිබදව වන මෙම සොයා ගැනීම සම්බන්ධ සියලු ලිපිගොනු නීතිපති දෙපාර්තමේන්තුවට ලබා දෙන බවත් ඒඅනුව නීතිමාර්ගයෙන් ඉදිරි කටයුතු සිදුවනු ඇති බවත් පැවසුවේය.
අද පන්සල් ගානේ යන මහින්ද රාජපක්ෂ දේශපාලන රැස්වීම් වලට භික්ෂූන් රැස් කිරීමට වියදම් කළ ලක්ෂ 50 ක මුදල් එක් පන්සලකට ලක්ෂය බැගින් දුෂ්කර පනසල් වලට යෙදවූවානම් මීට වඩා යහපතක් සිදුවනු ඇති බවත් හෙතෙම වැඩිදුරටත් පැවසුවේය.
