මෙම වසර අවසානයේ දී ඩයස් පෝරාව වෙනුවෙන් ශ්රී ලංකාවේ පැවැත්වීමට සුදානම් වන සැණකෙළියක සදහා එක්සත් ජාතීන්ගේ මානව හිමිකම් කවුන්සිලයේ අමෙරිකානු ඩොලර් මිලියන 3.5 මුදලක් ලබා දී ඇති බවට එල්ල කරන චෝදනාවලට අමාත්‍යවරයා මෙහිදී පිළිතුරු දුන්නේය.
අමාත්‍යවරයා පැවසුවේ එවැනි කිසිදු මුදලක් හෝ යෝජනාවක් එක්සත් ජාතීන්ගේ මානව හිමිකම් කවුන්සිලය විසින් සිදු කර නොමැති බවත් ඇතැම් පාර්ශව කරනු ලබන එවැනි චෝදනා පදනම් විරහිත බවයි.
එසේම විදේශ ගත ශ්රී ලාංකිකයින්ගෙන් රටේ සංවර්ධනය සදහා දායක කර ගැනීම වරදක් දැයි අමාත්‍යවරයා මෙහිදී ප්‍රශ්ණ කර සිටි අතර නුගත් පිරිස් ඩයස් පොරාව කියා සිතන්නේ වෙනත් ග්‍රහලෝකයෙන් පැමිණෙන ත්‍රස්තවාදින් සංවිධානයක් බවයි යනුවෙන් පැවසුවේය.
මෙහිදී ජාති, ආගම්, සංස්කෘතික වෙනස්කම්වලින් තොරව කටයුතු කළ යුතු බවත් ඩයස්පෝරාව කොන්කිරීමේ ප්‍රතිපත්තියෙන් අප බැහැර විය යුතුව ඇති බවත් මෙය සංහිඳියාවේ එක් ක්‍රියාමාර්ගයක් බවත් අපේ රට ආර්ථික වශයෙන් දියුණු කිරීමට මෙම ඩයස්පෝරාව යොදාගත හැකි බව ද අමාත්‍යවරයා පැවසිය.
එසේම අමාත්‍යවරයා වැඩිදුරටත් පැවසුවේ විදේශවල සිටින සියලුම ශ්රී ලාංකිකයන් සම්බන්ධව අපේ විදෙස් රාජ්‍යතාන්ත්‍රිකයින් සම්බන්ධතා ගොඩනඟා ගත යුතුයි. ජනාධිපතිතුමා, අගමැතිතුමා විදෙස් රාජ්‍යතාන්ත්‍රිකයින්ගේ ක්‍රියාකලාපය පිළිබඳ සම්පූර්ණ විශ්වාසය තබා තිබෙන බවයි.
උතුරු, නැ‍ඟෙනහිර ගොඩනැඟීම සම්පූර්ණයෙන් සිදුවී නොමැති බවත් භෞතික සම්පත්වලින් පමණක් සමෘද්ධිය හා සංහිඳියාව ඇති කිරීමට නොහැකි බව මෙවර ජනපතිවරණයේදී ජනතාව පෙන්වා දුන් බව ද හෙතෙම පැවසිය.
යුද්ධයෙන් පසු පශ්චාත් යුද සමයේ සංහිඳියාව සම්බන්ධයෙන් අප කටයුතු කළ යුතු වන බවත් ඒ සඳහා දේශිය යාන්ත්‍රණයක් අවශ්‍යය බවත් අවධාරණය කළේය.
අමාත්‍යවරයාගේ සම්පූර්ණ කතාව පහතින් නරඹන්න
