විශේෂයෙන්ම රාජපක්ෂ රෙජිමය පරාජයට පත් කිරීම සඳහා ඊට එරෙහිව වන සමාජ ක්‍රියාකාරිත්වයට පක්ෂපාත කාර්ය භාරයට අප එකතු වූයේ මෙරට ප්‍රජතන්ත්‍රවාදය තහවුරු කිරීමේ අරගලයට මාධ්‍යවේදීන් ලෙස අපටද වගකීමක් ඇති නිසාය. එවකට තිබූ අවධානම් සහගත තත්වය හමුවේ වුව ඉදිරි පෙළේ සිට ඒ වෙනුවෙන් සටන් කිරීමේ ශක්තිය ධෙෙර්යය අපට තිබිණි. අද දිනයේදිද අප පෙනී සිටින්නේ සමාජ සාධාරණත්වය වෙනුවෙනි. ප්‍රජාතන්ත්‍රවාදය වෙනුවෙනි. ඒ සම්බන්ධයෙන් කිසිදු දෙගිඩියාවකින් තොරව පෙනී සිටීමේ ශක්තිය හා ධෙෙර්ය අප සතුය,
මේ දක්වා අප වෙබ් අඩවිය සමඟ අති විශාල පාඨකයන් පිරිසක් එක් වී සිටී. ඒ ඇතැම් දිනෙක වෙබ් අඩවියේ පිවිසුම් සංඛ්‍යාව එක්ලක්ෂ තිස්දහස දක්වා වූ තරම් විශාල සංඛ්‍යාවක් විය. සාමන්‍ය වශයෙන් දිනපතා දස දහසක පහලොස් දහ්සක පාඨක සංඛ්‍යාවක් පිවිසෙන අප වෙබ් අඩවියට ඇතැම් දිනෙක ලක්ෂය ඉක්මවූ පාඨක පිරිසක් පිවිසූන අවස්ථාද විය. කෙසේ නමුත් කිසිදු ප්‍රධාන පෙළේ මාධ්‍ය ජාලයකට සම්බන්ධතාවයක් නොමැතිව කිසිදු දෙශපාලන පක්ෂයකට හෝ කණ්ඩායමකට හෝ ඓන්ද්‍රීය සම්බන්ධය හෝ නොමැතිව අන්තර්ජාලය පරිහරණය කරන ග්‍රාහකයන් අතර ජනප්‍රිය වෙබ් අඩවියක් බවට ලංකා ඩේලී අද පත්ව තිබේ.
එම තත්වය උදා වීමට හේතුව අපගේ මති මතාන්තර ප්‍රජතන්ත්‍රවාදය වෙනුවෙන් වන පක්ෂපාතිත්වය මත හැඩ ගැසුනු හා සෘජුව ඒ වෙනුවෙන් පෙනී සිටීම නිසාවෙන් බව අප විශ්වාස කරමු.
එම විශ්වාසය තුළ ඉදිරියටත් අප අපගේ යුග මෙහෙවර ඉ‍ටු කරමු.
