පසුගිය ජනාධිපතිවරණ සමයේදී සන්ධානය මහින්ද රාජපක්ෂ මහතා ගේ මැතිවරණ ව්‍යාපාරය වෙනුවෙන් යොදා ගනු ලැබුවේ දෙමල මුස්ලිම් විරෝධී ප්‍රතිපත්තියකි. එදා එම මැතිවරණ ව්‍යාපාරයට නායකත්වය දුන් මහින්ද රාජපක්ෂ ඇතුළු ජාතිවාදී නායකයන් සියල්ලම මෙවරද සන්ධානයෙන් තරග කිරීමට නියමිතය.
ඒ අනුව උග්‍ර සිංහල ජාතිවාදීන් වන විමල් වීරවංශ, උදය ගම්මන්පිළ ආදීන් මෙවර මැතිවරණ වේදිකාවේදී එම ජාතිවාදි ව්‍යාපාරයම ගෙන යනු ඇත. ඒ වඩාත් පැහැදිලි වන්නේ 'මහින්ද සමඟ නැගිටිමු' මැයෙන් පැවැත්වූ රැළි මාලාවේදී රාජපක්ෂ මහතාව උත්කර්ෂයට නැංවීම සඳහා යොදා ගනු ලැබුවේ ජාතිවාදය බැවිනි. රාජපක්ෂ මහතාද මෙම ජාතිවාදී ව්‍යාපාරය අනුමත කරමින් කටයුතු කළේය.
මෛත්‍රීපාල සිරිසේන මහතා ජනාධිපතිවරණයේදී සුළු ජාතීන් කෙරෙහි විශේෂ නැමියාවක් දැක්වූවකු වූවද මහ මැතිවරණයේදී එම ප්‍රතිපත්තිය තුල සිටිමින් ඔහුට කටයුතු කිරීඑමට ඉඩක් ලැබෙනු ඇතැයි උපකල්පනය කළ නොහැක. මහින්දවාදීන් සන්ධානය තුල වඩා බලවත් වීමත් ඔවුන්ව පාලනය කිරීමට ඔහුට කිසිදු ශක්තියක් නොමැති බව රාජපක්ෂ ඇතුළු දූෂිත නඩයට නාම යෝජනා ලබා දීමට තීරණය කිරීමෙන්ම පැහැදිලි වන නිසාත් ජාතිවාදීන් බලවත් වන බව දේශපාලන විචාරකයෝ පෙන්වා දෙති.
