අධ්‍යාපනය සමාජයක සක්‍රීය පැවැත්ම හා සංවර්ධනය උදෙසා අත්‍යවශ්‍ය කොන්දේසියක් බව අපහට කිසිදු වාදයක් නොමැත. දරුවෙකුට දිය හැකි වටිනාම ධනය වන්නේ අධ්‍යාපනය බවට කියමනක්ද පවතී. හොඳම දේ දරුවන්ට කියමින් බලයට පැමිනෙන සියලුම දේශපාලඥයින් හැමදාකම කලේ මැතිවරණ කාලයේ තමන්ව කර මත තබාගෙන පැමිණි ජනතාවගේ බලාපොරොත්තු විනාශ කර දැමීම පමණි. සෑම මැතිවරණයකදීම ‘නිදහස් අධ්‍යාපනය’ සියළුම ඡන්ද වේදිකාවන්ගේ ප්‍රධාන සටන් පාඨයක් විය. නමුත් සෑමදාකම සිදුවන්නේ පාසලේ නඩත්තු ගෙවීමට දරුවන්ට වතු වලට පැන පොල් සොරකම් කිරීම පමණය.
රාජපක්‍ෂ පාලන සමයේ අධ්‍යාපනය සඳහා වෙන්කල මුදල් දිනෙන් දින කප්පාදුකල බව නොරහසකි. ඒ බව නොපැකිලිව අප පවසන්නෙමු. අවසානයේ අධ්‍යාපනය වෙනුවෙන් අයවැයෙන් ලබාදෙන ප්‍රතිපාදන වැඩිකරන ලෙස විශ්වවිද්‍යාල ආචාර්යවරුන්ට පවා මහපාරේ අරගල කරන්නට සිදුවිය. නිදහස් අධ්‍යාපනය මොනයම් හෝ ප්‍රමාණයකින් මේ වනවිටත් ආරක්‍ෂාවී තිබෙන්නේ විශ්වවිද්‍යාල සිසුන්ගේ අරගලය නිසා බවද අප පවසන්නෙමු. වර්තමාන යහපාලන ආණ්ඩුවේද ප්‍රධාන සටන්පාඨයක් වුයේ අධ්‍යාපනයට වැඩි ප්‍රතිපාදන වෙන්කිරීම සහ රාජපක්‍ෂ පාලන සමයේ අධ්‍යාපන කප්පාදුව අවසන් කිරීමයි. ජනතාවට එවැනි බලාපොරොත්තු දුන් වර්තමාන යහපාලන ආණ්ඩුවද නිදහස් අධ්‍යාපන කප්පාදු කිරීමේ ප්‍රතිපත්තියේ එල්බ සිටින බව මේවන විට දකිනට ඇත.
පසුගිය කාලයේ නොවු දේවල්ද මේ වනවිට සිදුවෙමින් පවතින බව දක්නට ඇත. ජනතාවගේ විරෝධය මත පාසල්වල දෙමාපියන්ගෙන් මුදල් අය නොකරන බවට පසුගිය ආණ්ඩුව නිකුත්කල චක්‍රලේකන පවා අහෝසිකරමින් වර්ථමාන අධ්‍යාපන අමාත්‍යවරයා චක්‍රලේකණයක් මේ වනවිට නිකුත්කර ඇත. මෙම චක්‍රලේඛණය නිසා පාසල්වලට හිතුමතේ දෙමාපියන්ගෙන් මුදල් අයකරගැනීමේ අවස්ථාව උදාකරදී තිබේ. මේ ආකාරයෙන් යහපාලනය ඇතිකරනවායැයි පවසමින් පැමිණි ආණ්ඩුවත් රාජපක්‍ෂ ආණ්ඩුවේ ප්‍රතිපත්තිම ක්‍රියාත්මක කිරීම පිළිබඳ අප කණගාටු වන්නෙමු. අවසානය ‘ හොඳම දේ මුදලාලිලාගේ දරුවන්ට පමනි ’ ලෙස වෙනස්වීම නොබෝ දිනකින් සිදුවන බවට පැවසිය යුතුය.
ඡායාරූප සහ සටහන -නිශාන්ත ප්‍රියදර්ශන
