නව පාර්ලිමේන්තුව සෑම පක්ෂයකටම රටේ පාලනයට දායක වීමට හැකි පරිදි සකස් කරන බව අග්‍රාමාත්‍ය රනිල් වික්‍රමසිංහ මහතා ප්‍රකාශ කොට ඇති අතර ඒ යටතේ රටේ ප්‍රමුඛ ක්ෂේත්‍ර කිහිපයක වගකීම් එම පක්ෂ දෙකටම පැවරෙනු ඇතැයි දැනගන්නට තිබේ.
මේ සම්බන්ධයෙන් කළ විමසුමකට පිළිතුරු දුන් රජයේ ජ්‍යෙෂ්ඨ ප්‍රකාශකයකු සඳහන් කළේ ඩොනමෝර් සම්ප්‍රදාය අනුව යමින් පාර්ලිමේන්තු කාරක සභා හරහා මුළු පාර්ලිමේන්තුවම ආණ්ඩුවක් බවට පරිවර්තනය වන පරිදි රටේ පාලන සැකැස්ම වෙනස් කිරීමට නව රජය ක්‍රියා කරනු ඇති බවයි.
විශේෂයෙන් ම වාරිමාර්ග සහ කෘෂිකර්ම ක්ෂේත්‍රයට ජනතා විමුක්ති පෙරමුණේ දායකත්වය වැඩි වශයෙන් ලබා ගැන්ම සම්බන්ධයෙන් දැනටම සාකච්ඡා සිදු වී ඇති බව ද ඔහු අනාවරණය කළේය.
එමෙන්ම මේ නව සැකැස්ම යටතේ රටේ ප්‍රමුඛ ක්ෂේත්‍රයන්ට අදාළ වගකීම් දැරීම සඳහා කැබිනට් මණ්ඩලයට ඇතුළුවීම අනිවාර්ය සාධකයක් නොවනු ඇති බව ද ඔහු සඳහන් කළේය.
මේ අනුව අවශ්‍ය නම් විපක්ෂයේ පක්ෂ ලෙස කටයුතු කරමින් ම රටේ පාලන ක්‍රියාවලියට සම්බන්ධ වීම සඳහා එම පක්ෂවලට අවස්ථාව සැලසෙනු ඇත.
නව පාර්ලිමේන්තුවේ අමාත්‍ය මණ්ඩලය තිස් දෙනකුට සීමා කිරීමට ජනාධිපති මෛත්‍රීපාල සිරිසේන මහතා දැනට තිරණය කොට ඇතත් ජාතික ආණ්ඩුවක් ස්ථාපිත කළහොත් අමාත්‍ය ධුර සංඛ්‍යාව වැඩි කිරීම සඳහා 19 වැනි ආණ්ඩුක්‍රම ව්‍යවස්ථා සංශෝධනයෙන් ප්‍රතිපාදන සලසා දී ඇත.
මේ සම්බන්ධයෙන් කළ විමසුමකට පිළිතුරු දුන් ද්‍රවිඩ ජාතික සන්ධානයේ ජ්‍යෙෂ්ඨ පාර්ලිමේන්තු මන්ත්‍රීවරයකු පැවසුවේ ජනාධිපති මෛත්‍රීපාල සිරිසේන මහතා සමඟ කටයුතු කිරීමට තමන්ට දැනට කිසිදු ගැටලුවක් නැති බවයි.
silumina
