අද වන විට රට තුළ ප්‍රජාතන්ත්‍රවාදය හා සාමකාමී පරිසරයක් අැති වී අැති බවත් මැතිවරණ කටයුතු පවා එංගලන්තයේ මෙන් සාමකාමී ලෙස නීතියට යටත්ව සිදුවන බවත් පැවසුවේය. නීතියට යටත්ව සියල්ල සිදුවන වටපිටාවක මේ ගිවිසුම ඉතා වැදගත් බවත් ඒ වෙනුවෙන් සියලුම පුරවැසි හා සිවිල් සංවිධාන එක්ව කටයුතු කරන බව හෙතෙම කියා සිටියේය.
ඩී.එස්-ඩඩ්ලිලාගේ යුගවලදී පවා මෙවැනි ජාතික පොදු අවශ්‍යතා වෙනුවෙන් දේශපාලන පක්ෂ මෙන්ම සිවිල් සංවිධානද එක්ව ගිවිසුම් සහගතව කටයුතු කළ බවත්, පසුව එකී අරමුණ ජයග්‍රහණය කිරීමෙන් පසු යළි වෙන්ව තම අරමුණු වෙනුවෙන් ක්‍රියා කළ බවත්, එහි කිසිදු ගැටළුවක් නොමැති බවත් අග්‍රාමාත්‍යවරයා මෙහිදී පෙන්වා දුන්නේය.
ඒ අනුව මේ රටේ ප්‍රජාතන්ත්‍රවාදය හා යහපාලනය නැවත ස්ථාපිත කිරීම සඳහා ගෙවුණු ජනවාරි 08 වන දිනයේ සහයෝගයෙන් ගොඩනැඟුණු ව්‍යාපාරය ශක්තිමත්ව ඉදිරියට ගමන් කළ යුතුව ඇති බවත්, ඒ වෙනුවෙන් ඉදිරියටත් කැපවීමෙන් කටයුතු කරන බවත් වික්‍රමසිංහ මහතා මෙහිදී අවධාරණය කළේය.
තරගකාරී වෙළෙඳ ආර්ථිකයක් ගොඩනැඟීම ඉලක්ක කරගත් එක්සත් ජාතික පක්ෂ ආණ්ඩුවක් තුළ සමාජ සාධාරණත්වය ඇති කිරීමට ද අමතක නොකරන්නේ යැයි අග්‍රාමාත්‍ය රනිල් වික්‍රමසිංහ මහතා අවධාරණය කළේය. ආර්ථිකය ජය ගත්ත ද සාධාරණත්වයකින් තොර සමාජයක එම ජයග්‍රහණයන්හි ප්‍රතිලාභ බෙදී නොයන බව හෙතෙම පෙන්වා දුන්නේය.
