වනජීවී සංරක්ෂණ දෙපාර්තමේන්තුව පිහිටුවීමේ අරමුණ මෙරට වනජීවීන් සංරක්ෂණය කරගැනීම විනා සත්වෝද්‍යාන වල සිරකර තැබීම සඳහා සතුන් සැපයීම නොවේ. එබැවින් වනජීවී අධ්‍යක්ෂ ජනරාල්වරයාගේ මෙම අත්තනෝමතික හා අසාධාරණ ක්‍රියාකලාපය අප දැඩිව හෙලා දකින්නෙමු.
වලසා යනු ශ්‍රී ලංකාවේ හමුවන ඉතා විරල ක්ෂීරපායී සත්වයෙකු බව නොකිව මානය. දැනට දිවයිනේ සිටින්නේ ඉතා සීමිත වලස් ගහනයක් පමණි. එබැවින් වනජීවී සංරක්ෂණ දෙපාර්තමේන්තුව සිදුකල යුත්තේ එම සීමිත වලස් ගහනය නියෝජනය කරන එක් සාමාජිකයෙකු හෝ යම්කිසි අනතුරකට පත්වූ විට එම සත්වයාට ප්‍රතිකාර කර පුනුරුත්ථාපනය කර නැවට වනපෙතට මුදා හැරීමය. නමුත් එම වගකීම නිසි පරිදි ඉටු නොකර මේ ආකාරයෙන් අපේ රටට හිමි සීමිත වනජීවී සම්පත් තම පටු වාසි ප්‍රයෝජන සඳහා භාවිතා කිරීමට වනජීවී අධ්‍යක්ෂවරයා කටයුතු කිරීම විමතියට කරුණකි.
එසේම අනෙක් අතින් සත්වෝද්‍යානයේ තමන් සතුව සිටින සතුන් අභිජනනය කරවා නව සතුන් ලබාගෙන සත්වෝද්‍යානවල ප්‍රදර්ශන අවශ්‍යතා ඉටුකර ගැනීමට කටයුතු නොකර මෙසේ මෙරට වනජීවීන්ට අත තැබීමට සත්වෝද්‍යාන දෙපාර්තමේන්තුවටත් කිසිඳු සදාචාරාත්මක අයිතියක් නොමැති බව අප අවධාරණය කරමු.
එබැවින් වනජීවී සංරක්ෂණ දෙපාර්තමේන්තුවේ සරණ පතා පැමිණි මෙම අසරණ වලසුන් සිවුදෙනා යලිත් උන්ගේ ස්වභාවික වාසස්ථාන වෙත යොමුකිරීමට අවශ්‍ය ක්‍රියාමාර්ග ගන්නා ලෙස අප බලධාරීන්ගෙන් දැඩිව ඉල්ලා සිටිමු.
සුපුන් ළහිරු ප්‍රකාශ්
ශ්‍රී ලංකා ජෛවවිවිධත්ව සංරක්ෂණ හා පර්යේෂණ කවය
