මේවන විට උතුරේ සිවිල් යුධ සමයේදී අත් අඩංගුවට ගෙන චෝදනා ගොනු කිරීමකින්ද තොරව හා නඩු විභාග කෙරුණද තවමත් නිතියෙන් දඬුවම් නොවිඳින තුන්සියයකට ආසන්න ප්‍රමාණයක් මෙරට රැඳවුම් බාරයේ සිටියදී මෙරට දේශපාලන සිරකරුවන් නොමැති බව ප්‍රකාශ කිරීම නරුම ප්‍රකාශයකි. විජේදාසට අනුව මෙය ආණ්ඩුවේ මතය වී තිබේ. එය සුපිරි කතාවකි.
මෙම පිරිස දේශපාලන සිරකරුවන් වේවා නොවේවා ඔහුන්ට නීතියේ පිළිසරණවත් නොමැතිව මෙලෙස සිරකර තබා ගැනීම කිසිසේත් අනුමත කළ හැක්කක් නොවේ.මෙය මේ ආණ්ඩුවේ ම්ලෙච්ඡත්වය පෙන්වීමකට වඩා දෙයක් වෙන්නේ නැත. යුද්ධයට වගකිවයුතු ඉහළ නායකයන් පසුගිය රාජපක්ෂ සමයේදීත් වත්මන් යහපාලන රජය යටතේත් සුරසැප විඳිමින් නිදහසේ කාලය ගත කරමින් සිටියද ඔවුන්ගේ නියෝග මත යුද්ධයට තල්ලු කරවනු ලැබූවන් සිරගතව සිටීම පුදුම විහිළුවකි.
එමෙන්ම හෙළ උරුමයේ චම්පික රණවකට මහරගම සිංහල බෞද්ධ ඡන්ද ගොඩ ලැබෙනු ඇති බවට, බරපතල ලෙස බිය වී සිටින විජේදාස මහතා, චම්පිකට වඩා ජාතිවාදියකු වන්නට සිතාගෙන මෙම නරුම ප්‍රකාශය කළාදැයිද සැකයක්ද තිබේ. රටේ සමස්ත පුරවැසියාට වෙනස්කම්වලට ලක් නොකර සැලකීමට නොහැකි මේ වෙස් මූණු ප්‍රජාතන්ත්‍රවාදීන්ව පක්ෂ ජාති බේදයකින් තොරව පිලිකෙව් කොට මෙරට දේශපාලනයෙන් ඉවත් කළ යුතුය.
මෙවැනි නරුම වර්ගවාදී දේශපාලනයක නියැලී සිටිවුන් මෙරටට කළ හානිය දැන් හොඳටෝම ඇතිය.
