ලසන්ත වික්‍රමතුංග ඝාතනය කෙරුණේ 2009 ජනවාරි 08 වැනිදා රත්මලාන ගුවන්තොටුපළ ආශ්‍රිත අධිආරක්ෂක කළාපයේදීය. යුද්ධය දරුණු ලෙස පැවති බැවින් දැඩි ආරක්ෂාවක් තරකර තිබුණු වටපිටාවක ඔහුව ඝාතනය කළ නාඳුනන තුවක්කුකරුවා කිසිදු සළකුණක් හෝ නොතියාම ආරක්ෂිත ලෙස පළාගොස් තිබිණි. එවන් හපන්කමක් එකළ කළහැකි වූයේ ආරක්ෂාව පිළිබඳ ඉහළම පුද්ගලයින්ගේ ආශිර්වාදයෙන් ම පමණකි. එපමණක් නොව ඝාතනය පිළිබඳව පරීක්ෂණ ද අමුතුම ආකාරයෙන් කෙරුණු අතර අත් අඩංගුවට ගත් පුද්ගලයෙකුද පොලිස් කූඩුව තුළම සියදිවි හානිකරගත්තා අපට මතකය.
ඒ වනවිටත් සන්ඩේ ලීඩර් පුවත්පත විසින් අනාවරණය කෙරුණු 'මිග්' ගණුදෙනුව නිසාවෙන් ගෝඨාභය රාජපක්ෂ ලසන්ත කෙරෙහි කිපී සිටි බැවින් වන්දි ඉල්ලා නඩුවක් පවරා තිබුණු අතර ලීඩර් පුවත් පතට එරෙහිව තමාගේ ප්‍රවෘත්ති පළකිරීම සම්බන්ධයෙන් වාරණ නියෝගයක්ද ලබාගෙන තිබිණි. ඝාතනයත් සමඟ ලසන්තගේ පවුල් ජීවිතයට අදාල තොරතුරු ඇදබාමින් රාජපක්ෂ හිතවාදී මාධ්‍ය චරිත ඝාතන මෙහෙයුමක නියළුණු අතර ම මහින්ද රාජපක්ෂ ද ලසන්තගේ සහ තමන්ගේ සමීප සම්බන්ධකමක් තිබුණු බව කියමින් ලසන්ත දෙබිඩි චරිතයක් ලෙස හැඟෙවෙන පරිදි හැසිරුණේය. කෙසේවෙතත් ඒවන විට සිටි හමුදාපති සරත් ෆොන්සේකාගේ නමද මෙම ඝාතනය සම්බන්ධයෙන් කියැවෙද්දී සඳහන් වී තිබුණි.
ඝාතනයෙන් පසුව ඒ පිළිබඳව විමසීමේදී ගෝඨාභය ඉතාමත් නරුම ලෙස විමසුවේ "කවුද ලසන්ත කියන්නේ?" කියා ය.
මහින්ද අද මේ කියන්නේ ඒ ගැන විය යුතුය. කෙසේවෙතත් ශ්‍රී ලංකාවේ මානව හිමිකම් සහ මාධ්‍ය නිදහස සම්බන්ධව ජාත්‍යන්තර ගැටළු එතරම් තිබුණු මොහොතක රාජපක්ෂ දෙබෑයන්ගෙන් කරුණු නොවිමසා කිසිවකු හිතුමතේ යමක් කළා වන්නට නම් නොහැක. එමෙන් ම සරත් ෆොන්සේකා සිරගත කෙරුණේද රාජපක්ෂ රජයෙනි. ඒ සඳහා ඔවුන් සොයා ගත්තේ මිළදී ගැනීම් කිහ්හිපයකට අදාල සිද්ධියක් සහ දේශපාලනය කතා කිරීම ගැන සිද්ධියකි. මෙතරම් බරපතළ යමක් රාජපක්ෂලාට භාවිත කළ හැකිව තිබිණි නම් ඔවුන් එය භාවිතා නොකර සිටිනු ඇත්ද ?
එසේම රනිල් වික්‍රමසිංහ විසින් මහින්දම කියනා චෝදනාව එල්ල කෙරුණේ රනිල් අගමැති වූ පසුවද ? නැත. ඒ මහින්ද ජනපතිව සිටි සමයයි. තම පවුලට එල්ල වී තිබුණු චෝදනාවෙන් ගැළවීමට හෝ ඔවුන් පරීක්ෂණයක් නොකළේ ඇයි ? එතරම්ම ජාත්‍යන්තර අපකීර්තියක් පවා දරාගෙන මෙතරම් කලක් ඔහේ සිටියේ ඇයි ?
අනෙක් අතින් මහින්දගේ චෝදනාව රනිල් වික්‍රමසිංහ වෙත යොමුකරන්නට අප ද කැමතිය. අපි මීට පෙරද මෙය ඇසූවෙමු. 2009 යුද්ධය ජයග්‍රාහී ලෙස ඇදෙමින් විපක්ෂය හතරගාතයෙන් ඇදදමා තිබුණු මොහොතක පවා තියුණු ආණ්ඩු විරෝධයක් මතු කෙරුණු පළමු මොහොත ලසන්ත ඝාතනයයි. සාටකයා - ඝාතකයා ලෙස සඳහන් පුවරු රැගෙන ජනතාව වීදිබැස්සේ ලසන්තගේ අවමඟුල දා ය. එදා පටන් විපක්ෂයේ සෑම මැතිවරණ වේදිකාවකම ලසන්ත ඝාතනය ගැන ද කියැවිණි. එහෙත් ඒ බලය ලබාගන්නා තුරු පමණක්ද ? අගමැති ලෙස රනිල් ලසන්ත ඝාතනය පිළිබඳව නිහඬ ඇයි ?
ලසන්ත ඝාතනය පිළිබඳව සිය බලය අහිමිවන තුරුම බබා පාට් දැමූ මහින්ද මෙන් ම බලය ලැබුණු පසුව අමතක පාට් දානා රනිල්ද එකලෙසම පෙන්වන්නේ බලය යන සංකල්පය ඉදිරියේ අන් දෑ කෙරෙහි තමුන්ගේ පවත්නා නරුමකමද?
රුවන් නෙලූ
