මෙවර මහ මැතිවරණය පිළිබඳව අදහස්‌ පළ කිරීමට යහපාලනය සඳහා වූ එක්‌සත් ජාතික පෙරමුණ විසින් කොළඹ පදනම් ආයතනයේදී ඊයේ (13 වැනිදා) පැවැත්වූ විශේෂ මාධ්‍ය හමුවකදී අගමැතිවරයා එම අදහස්‌ පළ කළේය.
දෙමළ ජාතික සන්ධානයේ ප්‍රතිපත්ති ප්‍රකාශයෙන් උතුර, නැගෙනහිරට ෆෙඩරල් පාලනයක්‌ ලබා ගන්නා බවට කර ඇති යෝජනාව සම්බන්ධව සිය මතය කුමක්‌ දැයි මාධ්‍යවේදියකු නැගූ ප්‍රශ්නයකට පිළිතුරු දෙමින් අගමැතිවරයා එසේ පැවැසීය.
රනිල් වික්‍රමසිංහ මහතා වැඩිදුරටත් මෙසේ ද කියා සිටියේය.
මම කිසි දිනක ප්‍රභාකරන් සමග ගිවිසුම් ගහලා නැහැ. මම ප්‍රභාකරන්ට සල්ලි දුන්නෙත් නැහැ. 2005 ජනාධිපතිවරණයේදී ප්‍රභාකරන්ගේ ඉල්ලීමට එකඟවුණොත් මා රටේ ජනාධිපතිවරයා බවට පත් කරන බව කියූ අවස්‌ථාවේදීත් මා ඔහු සමග කිසිදු ලියවිල්ලක්‌ අත්සන් කළේ නැහැ.
එහෙනම් දැන් මොකටද අත්සන් කරන්නේ? විශේෂයෙන්ම ජයග්‍රහණයක්‌ ලබාගන්න පිළිවන් අවස්‌ථාවේදී මොකටද මේවාට කැමැති වෙන්නේ? නමුත් මා බලය බෙදනවා ගම දක්‌වා. ඒත් ඒ බලය දෙන්නේ දේශපාලනඥයන්ට නොවෙයි. අපි බලය දෙන්නේ ගමේ පොදු සංවිධානවලට සහ ආගමික සිද්ධස්‌ථාන නායකයන්ට. විශේෂයෙන්ම අපි ඇතිකරන පොකුරු ගම්මානවලට.
අපි පොකුරු ගම්මාන 2500 ක් ඇතිකොට එහි පාලනයට ග්‍රාම රාජ්‍යයට සමාන කමිටුවක්‌ පත් කරනව. ගමේ පොදු සංවිධානවල සහ ගමේ ආගමික ආයතනවල නායකයන් මේවාට අපි පත් කරනවා.
divaina
