ශ්‍රී ලංකා නිදහස් පක්ෂයේ ජේෂ්ඨයන් සමඟ පැවැති සාකච්ඡාවකදී නියෝජ්‍ය කථානායකධුරය සඳහා ප්‍රථමයෙන් යෝජනා වී තිබුණේ හිටපු නියෝජ්‍ය කථානායක චන්දිම වීරක්කොඩි මහතාගේ නම වුවත් ඔහු ඊට කැමැති වූයේ නැත. ඔහු කැබිනට් ඇමැතිධුරයක් හෝ නියෝජ්‍ය ඇමැතිධුරයක් බලාපොරොත්තු වන බව දන්වා තිබේ . ඒ අනුව පත්කළ මන්ත්‍රී ඩිලාන් පෙරේරා මහතාගේ නම යෝජනා වූ නමුත් ඔහුද ඒ ප්‍රතික්ෂේප කළ අතර ඔහු විසින් එජාපයේ පත්කළ මන්ත්‍රී අතුරලියේ රතන හිමි මේ සඳහා සුදුසු බව යොජනා කර ඇත. එහෙත් ජනාධිපති මෛත්‍රීපාල සිරිසේන මහතා පවසා ඇත්තේ නියෝජ්‍ය කථානායක ධුරය ශ්‍රි ලංකා නිදහස් පක්ෂයට හිමි විය යුතු බවත්ය. ඉන් අනතුරුව ජනාධිපතිවරයා තිලංග සුමතිපාල මහතා ගේ නම යෝජනා කර ඇති අතර ඊට ජේෂ්ඨයන්ගේ කැමැත්ත හිමිව තිබේ.
තිලංග සුමතිපල මහතා විසින්ද ඊට කැමැත්ත ප්‍රකාශ කර ඇති බවද වාර්තාවේ. මැතිවරණයෙන් පරාජය වී පසුව ජාතික ලැයිස්තුවෙන් ඇතුලත් කර ගන්නා ලද මන්ත්‍රීවරුන්ට ඇමැතිකම් ලබා නොදෙන බවට ජනාධිපතිවරයා තීරණය කර ඇති නිසා සුමතිපාල මහතාට ඇමැතිවරයකු වීමේ වරම අහිමිව ඇත.
පාර්ලිමේන්තුවේ කථානායකධුරය සඳහා එජාපයේ පත් කළ මන්ත්‍රී කරූ ජයසූරිය මහතාගේ නම මේවන විට යෝජනා වී ඇති අතර ඒ සඳහා සියලු පාර්ශ්වයන්ගේ කැමැත්ත හිමිව ඇත.
