එම පාසලේදී පහේ ශිෂ්‍යත්ව විභාගයෙන් ඉහළින්ම සමත් වූ ජයසේකර මහතා ඉන්පසුව ටික කලකට මීගමුව හරිස්චන්ද්‍ර විදුහලට ඇතුළත් විය. ඉක්බිති නාරම්මල මයුරපාද මැදි විදුහලට ඇතුළත් වූ ඒ මහතා එහිදී අ.පො.ස. සාමාන්‍ය පෙල හා උසස් පෙල සමත් වූයේ සෑම වසරකම වාර අවසාන විභාගවලදී ප්‍රථම ස්ථානයට පත්වෙමිණි.
දයාසිරි ජයසේකර ක්‍රීඩා දිවිය අරඹන්නේ නාරම්මල මයුරපාද මධ්‍ය විදුහලෙනි. එම විදුහලේ වයස අවුරුදු 13න් පහළ ක්‍රිකට් කණ්ඩායමේ නායකත්වයට පත්වන ඔහු වොලිබෝල් ක්‍රීඩාවේ සමර්ථයෙකුද වෙයි.
යෞවනයට පිවිසෙමින් සිටින දයාසිරි ජයසේකරගේ ක්‍රීඩාව පාසල් ක්‍රිකට් තරග බිමෙන් නතර නොවේ. ඔහු, මලල ක්‍රීඩාවේ ජවන පමණක් නොව පිටිය ඉසව්වලටද පිවිසෙමින් කැපී පෙනෙන දස්කම් ප්‍රදර්ශනය කරයි. කලාපීය මට්ටමේ ප්‍රධාන මලල ක්‍රීඩා පිටියට පිවිසෙන ඔහු එහිදී මීටර 100, 200, කවපෙත්ත විසි කිරීම හා යගුලිය දැමීම ඉසව්වල ජයග්‍රහණ වාර්තා කරයි. මයුරපාද කෙඩෙට් කෝප්ස් සාමාජිකත්වයේ පෙරමුණේ ම සිටි දයාසිරි ජයසේකර විශිෂ්ට දක්ෂතා දක්වන්නේ අනුරාධපුර, මහනුවර කිංග්ස්වුඩ් විදුහල හා මීගලව පැවැති කඳවුරුවලදී හයවැනියට හොඳම කණ්ඩායම් කෙඩෙට් කෝප්ස් සැරයන් බවට පත්වෙමිනි.
රණකාමීයෙකු වන දයාසිරි ජයසේකර සටන් කලාවේද ශූරයෙකි. ජයන්ත අබේකෝන් හා සීවලී වික්‍රමාරච්චි යන මාස්ටර්වරුන්ගේ දක්ෂ ‘කුන්ගු ෆු’ ගෝලයෙකි. වාග් ප්‍රහාරයේද පෙලහර පාමින් සරසවියට පිවිසෙන දයාසිරි ජයසේකර මහතා එහිදී නීතිඥ පීඨ ක්‍රිකට් කණ්ඩායමේ නායකයා වෙයි. සිය මලල ක්‍රීඩා හැකියාවන් අමතක නොකරමින් අන්තර් විශ්වවිද්‍යාල ක්‍රීඩා උළෙලේදී කවපෙත්ත විසිකිරීම ඉසව්ව ජයග්‍රහණය කරයි.
වාග් ප්‍රහාරයේද අති දක්ෂයෙකු වෙමින් මෙරට ක්‍රීඩාවේ එක් ප්‍රධානතම පෙර ගමන්කරුවකු ලෙසින් සමාජගත වන දයාසිරි ජයසේකර මහතා කලාකාමී ප්‍රජාවගේද සමීපතමයෙකි. ඒ ගායනයෙනි. සංගීතය අගය කරමිණි.
මේ සියල්ල එකට කැටිකර ගත්කළ මෙරට ක්‍රීඩා ක්ෂේත්‍රයේ ලොකු පුටුවට පත්ව සිටින්නේ අපූරු මිනිසෙකි. කලාවටත් ලැදි...සටනටත් කැමැති මිනිසා සැමවිටම අති සුන්දර වෙයි!
dinamina
