නාරාහේන්පිට අභයාරාමයේදී පැවැති හමුවකින් අනතුරුව මාධ්‍ය වෙත අදහස් දක්වමින් ඒ මහතා වැඩිදුරටත් සඳහන් කළේ යුද සමයේදී එල්ල වූ තර්ජන හේතුවෙන් එවැනි බංකරයක අවශ්‍යතාව දැනී තිබුණු බවත්, ඒ අනුව එය ඉදි කළ බවත්ය.
“මෙතෙන්ට අහසින් ඇවිත් ප්ලේන්වලින් ගැහුවා කියලා අද තරුණයන්ට අමතක වෙලා. කොළඹට ගැහුවා. කොටින්ට ප්ලේන් තියෙනවා, නැව් තියෙනවා කිව්වාම අපි ඒකට සූදානම් වුණා' යනුවෙන් හෙතෙම වැඩිදුරටත් පවසා සිටියේය.
එහෙත් අප වෙත ඇති තොරතුරු අනුව මෙහි සාකච්ඡා, සාමාගම්, සාජ්ජ පවත්වා ඇත්තේ නාමල් රාජපක්ෂ හා ඔහුගේ මිතුරු මිතුරියන්ය. මහින්ද රාජපක්ෂ මහතා මෙහි පැමිණ ඇත්තේ එක දිනක් පමණි. ඒ ද විනාඩි කිහිපයකටය.
රාජපක්ෂ පදිංචිව සිටි අරලිය ගහ මන්දිරයේ ආරක්ෂක බංකර් තිබීම පිළිගත හැකිය. ආරක්ෂක මණ්ඩල සාක්ච්ඡා ආදිය එහි පැවැත්වීමත් සිදු විය හැකිය. එහෙත් ආරක්ෂක බංකර් වෙනුවට සුඛෝපභෝගී බංකර් මාළිගා තැනීමේ අවශ්‍යතාවය කුමක්ද යන්න රාජපක්ෂවරු පැහැදිලි කරන්නේ නම් මැනවි.
මේ තනිකරම ඒකාධිපති මානසික අවශ්‍යතාවයක් සන්තර්පනය කර ගැනීම වෙනුවෙන් මහජනතාවගේ මුදල් නැති බංගස්ථාක කිරීමක් පමණි.
රාජපක්ෂ පවසන ලෙස '..කොටින්ට නැව් තියෙනවා ප්ලේන් තියෙනවා කිව්ව්වාම අපි එකට සූදානම් වුණා..' කියන කතාව මේ රටේ ආරක්ෂක බුද්ධි අංශ 'පීචං'කර දැමීම වෙනුවෙන් හිතා මතාම කියපු කතාවක් වැනිය. රාජපක්ෂ මහතාට කොටින්ට ප්ලේන් තියෙනවා, නැව් තියෙනව කියා කවුරු විසින් පැවැසූවත් ඒ බුද්ධි අංශවලට ඒ නැව් හෝ ප්ලේන් ගැන නිවැරදි තොරතුරක්, මේ ලෝක දැනුමක් තිබී නැති බවත් මේ කතාවෙන් පැහැදිලිය. එහෙව් බුද්ධි අංශයක් සමඟ මේ යුද්ධය ජය ගැනීමත් අපූරු වැඩකි.
ඊටත් වඩා පසුගිය කාලයේ සිදුව තිබෙන දේශපාලන ඝාතන, මාධ්‍යවේදී ඝාතන ආදි රාජපක්ෂලාගේ දේශපාලන අපරාධ සියල්ල කර තිබෙන්නේ මේ බුද්ධි අංශ විසින් බව දැන් අනාවරණය වී තිබේ. ඒ අනුව මේ බුද්ධි අංශ යුද්ධය වෙනුවෙන් කිසිවක් කර නැති ගානය. කොටින්ගේ ප්ලේන් ගැන නැව් ගැන රාජපක්ෂ මහතාට ලබා දී තිබෙන වාර්තා බුද්ධි අංශ විසින් ලබා දුන් ඒවා නම්, ඒ පට්ට පල් බොරු ගොඩකි. මන්ද මේ බංකර තනා ඇත්තේ එසේ මෙසේ ප්‍රහාරයකින් බේරීමටද නොවේ. දීර්ග කාලයක් තිස්සේ කෙරෙන දැවන්ත ගුවන් ප්‍රහාරයන්ට ඔරොත්තු දෙන ලෙසය. එල්ටීටීඊයේ කුරුම්බැට්ටි ගුවන් ප්‍රහාරයෙන් පසුව තමන්ට බුද්ධි අංශ ලබා දුන් තොරතුරු බොරු බව රාජපක්ෂ මහතා හොඳින්ම අවබෝධ කර ගන්නට ඇත. අද බුද්ධි අංශ 'පීචං'වෙන විදිහේ කතාවක් කීවේ ඒ විය හැකිය.
