ලලිත් කුමාර්ගේ පියා තම පුත්‍රයාගේ අතුරුදන් වීම සම්බන්ධයෙන් පරීක්ෂණ විධිමත් කරන ලෙසත්, එම පරීක්ෂණවල වර්තමාන තත්ත්වය තමන්ට දැනුම් දෙන ලෙසත් ඉල්ලා ඇමැතිවරයාට ලිපියක් භාර දෙන ලදි. එහිදී ඇමැතිවරයා වැඩිදුරටත් ලලිත්ගේ පියාට පැවසුවේ ලලිත් පිළිබඳ බලාපොරොත්තු අත්නොහරින ලෙසත් ඔහු සෙවීමේ කටයුතු ආණ්ඩුව දිගටම කරගෙන යන බවත් ය.
ලලිත් කුමාර්ගේ 34 වැනි උපන් දිනය අදට යෙදී ඇත. ඔහු ජනතා විමුක්ති පෙරමුණේ පූර්ණ කාලීන සාමාජිකයකු ලෙස කටයුතු කොට පසුව එයින් ඉවත්ව පෙරටුගාමී සමාජවාදී පක්ෂය ගොඩ නැගීමට තම දායකත්වය ලබා දුන්නේය. යාපනයේ සිදු වූ අතුරුදන්වීම් සහ මානව හිමිකම් උල්ලංඝනයවීම් වලට එරෙහිව ප්‍රබල හඬක් නැගූ ලලිත්ව යාපනයෙන් ඉවත් කරගන්නා ලෙස අනතුරු අඟවමින් මෙම අතුරුදන් වීමට පෙර ලලිත්ගේ පියාට දුරකතන ඇමතුම් ගණනාවක් ද ලැබී තිබිණි.
මේ අතර ලලිත්ගේ පියා පවසන්නේ මෙම අතුරුදන්වීම සම්බන්ධයෙන් පරීක්ෂණ කඩිනම් කරන ලෙස ඉල්ලමින් ජනාධිපතිවරයාට සහ අගමැතිවරයාට ද ලිපි දෙකක් භාරදීමට ලබන සතියේදී කටයුතු කරන බවයි.
