මේ වන විට එම දේශපාලන සිරකරුවන් දෙදෙනාගේ අයහපත් සෞඛ්‍ය තත්ත්වය මත ඔවුන් දෙදෙනා වැලිකඩ බන්ධනාගාරයෙන් බන්ධනාගාර රෝහලට ඇතුළත් කරනු ලැබ සිටිති.
වෛද්‍ය ප්‍රතිකාර ප්‍රතික්ෂේප කරමින් ඔවුන් දිගටම උපවාසයේ නියුතු බව දේශපාලන සිරකරුවන් නිදහස් කර ගැනීමේ ජාතික ව්‍යාපාරයේ සත්‍යවේල් පියතුමා පැවසීය. ඔහු වැඩිදුරටත් පවසා සිටියේ අදාල බලධාරීන් කිසිවෙක් මෙකී සිරකරුවන් දෙදෙනාගේ උපවාසය කෙරෙහි මෙතෙක් මැදිහත් වී නොමැති බවයි.
ඔවුන්ගේ ඉල්ලීම් වූයේ නීතිපති දෙපාර්තමේන්තුවේ හෝ අගමැති කාර්යාලයෙන් බලය ලත් නිලධාරියකු පැමිණ, නීතිය ඉදිරියේ ඔවුන්ට සිදුවූ අසාධාරණය පිළිබඳව සලකා බලන ලෙසයි. හුදෙක් සිංහල නොදත් ඔවුන්ගෙන් ලබාගත්තායැයි කියන පාපොච්චාරණයන් මත පමණක් ම ලඝු වෙමින් ගොණු කෙරුණු ඔවුන්ගේ නඩු වලදී නීතිපති දෙපාර්තමේන්තුවේ සහ පොලීසියේ පළිගැනීමට තමන් ලක්වූ බව ඔවුහු කියති.
එසේම, මින් සිවරාජා ජෙනිවන්ට එල්ල වී ඇති චෝදනාව 2006 වසරේ දී එවකට ඇමති සහ වත්මන් ජනපති මෛත්‍රීපාල සිරිසේන මහතා ඝාතනයට තැත් කිරීම වීම නිසාවෙන් දෝ උක්ත කී සංවිධානය හැර කිසිදු ජනමාධ්‍යයක් හෝ මානව හිමිකම් සංවිධාන හෝ දේශපාලනඥයින් හෝ මෙම ගැටළුවේදී ඉදිරිපත් වන ස්වභාවයක් ද පෙනෙන්නට නැත.
සැබැඳි පුවත් :
