ඔවුන් විසින් නිකුත් කළ නිවේදනයක මේ බව සඳහන්ය.
එම නිවේදනය මෙසේය.
ජන අරගල ව්‍යාපාරයේ ක්රියාකාරීන් වූ ලලිත් කුමාර් වීරරාජු හා කුහන් මුරුගානන්දන් 2011 දෙසැම්බර් 10 වෙනිදා යාපනයේදී පැහැරගැනීමට ලක්ව අද දක්වාම කිසිඳු තොරතුරක් නොමැතිව අතුරුදන්ව සිටී. වසර 04කටත් වැඩි කාලයක් ගෙවී ගියද තවමත් ඒ පිළිබඳ විධිමත් කඩිනම් හා විනිවිද පෙනෙනෙ සුළු පරීක්ෂණයක් සිදුකර නොමැත. ඔවුන් දෙදෙනා පැහැරගත් සමයේ පැවති ආණ්ඩුවේ කැබිනට් අමාත්‍යවරයෙකු වූ මහින්දානන්ද අලූත්ගමගේ මන්ත‍්‍රීවරයා පසුගිය ජනවාරි 02 සෙනසුරාදා පෞද්ගලික රූපවාහිනී නාලිකාවක පැවති සංවාදයකදී ඔවුන් දෙදෙනා ඝාතනය වූවන් ලෙස නම් කරන ලදී. ඔවුන් ඝාතනය වූවන් ලෙස නම් කිරීමට නම් මේ දෙදෙනා පැහැරගැනීම හා ඉන් අනතුරුව සිදුවූ දේ පිළිබඳව මහින්දානන්ද අලූත්ගමගේ මන්ත‍්‍රීවරයා දැනුවත්ව සිටිය යුතුය. නමුත් පොලිසිය පවසා ඇත්තේ ඒ පිළිබඳ තොරතුරු දන්නා අය සොයාගත නොහැකි බැවින් පරීක්ෂණ කටයුතු අඩාල වී ඇති බවය. මහින්දානන්ද අලූත්ගමගේ මන්ත‍්‍රීවරයා තමන් ඒ පිළිබඳව දන්නා බව හඟවා ඇති බැවින් එම ප‍්‍රකාශය පිළිබඳව වහාම පරීක්ෂණයක් දියත් කරන ලෙස අදාල බලධාරීන්ට බලකර කියා සිටිමු.
පසුගිය ආණ්ඩුවේ කැබිනට් මාධ්‍ය ප‍්‍රකාශකවරයා වූ කෙහෙළිය රඹුක්වැල්ල මන්ත‍්‍රීවරයාද මේ සිදුවීම සිදුවූ සමයේදීම තමන් ඒ පිළිබඳව දැනුවත් බවට මාධ්‍ය හමුවකදී ප‍්‍රකාශ කළද ඒ පිළිබඳව ප‍්‍රකාශයක් සටහන් කරගැනීම පවා පොලිසිය විසින් සිදුකළේ නැත. මේ පිළිබඳව විමසීම සඳහා කෙහෙළිය රඹුක්වැල්ල මන්ත‍්‍රීවරයාට වසර කිහිපයක් තිස්සේ අධිකරණය නොතීසි නිකුත් කළද ඔහු අධිකරණය මගහැර සිටියේය. පසුව 2015 නොවැම්බර් 13 වෙනිදා ඔහුව අත්අඩංගුවට ගෙන අධිකරණයට ඉදිරිපත් කරන්නැයි යාපනය මහේස්ත‍්‍රාත්වරයා පොලිසියට නියෝග කළේය. මාස එකහමාරකටත් වැඩි කාලයක් ඉක්ම ගියද පොලිසිය තවමත් එම අධිකරණ නියෝගය පවා උල්ලංගනය කරමින් සිටී. මහින්දානන්ද අලූත්ගමගේ මන්ත‍්‍රීවරයා ප‍්‍රකාශයක් සිදුකරන්නේ මෙවැනි පසුබිමක් තුළය.
පසුගිය ආණ්ඩුවේ ප‍්‍රජාතන්ත‍්‍රවිරෝධී ක‍්‍රියාවන්ට ගොදුරුවූවන් සඳහා සාධාරණය ඉටුකරන බවටත් සියලූ සිදුවීම් සඳහා පරීක්ෂණ සිදුකරන බවටත් පොරොන්දු දී බලයට පැමිණි වත්මන් ආණ්ඩුවද චූදියන් ආරක්ෂා කිරීමේ සම්මුතියක සිටින බව පෙනේ. එබැවින් මේ සියලූ ප‍්‍රකාශ පිළිබඳව පරීක්ෂණයක් පවත්වන ලෙසත් ලලිත් කුහන් ඇතුළු සියලූ අතුරුදන් වූවන් පිළිබඳ සත්‍ය හෙලිදරව් කරන ලෙසත් ආණ්ඩුවට බලකිරීමට පෙළගැසෙන්නැයි ප‍්‍රජාතන්ත‍්‍රවාදය අගයන කොටස්වලින් සහ සමස්ථ ලාංකීය ජනතාවගෙන් ඉල්ලා සිටිමු.
