නාවික හමුදා රග්බි කණ්ඩායමේ හිටපු නායක යෝෂිත රාජපක්ෂට සහාය පළ කිරීම සඳහා අත්පටි පැළඳ ක්‍රීඩා කළ නාවික හමුදා රග්බි කණ්ඩායමේ ක්‍රීඩකයන් හතර දෙනාට තරග තහනමක් පැනවූ බව නාවික හමුදා මාධ්‍ය ප්‍රකාශක කපිතාන් අක්‍රම් අලෙවි පවසයි.
‘ නාවික හමුදාව මේ ක්‍රීඩකයන් විනය පරීක්ෂණයකට ලක් කළා. එහි ප්‍රතිඵලයක් ලෙස මෙම ක්‍රීඩකයන් හතර දෙනා තරග තහනමකට ලක් කළා. ඔවුන් සම්බන්ධයෙන් ඉදිරි පරීක්ෂණ නිම වනතුරු මෙම තරග තහනම බලපැවැත්වෙනවා.‘ නාවික හමුදා මාධ්‍ය ප්‍රකාශකවරයා කියා සිටියේ ය.
ශ්‍රී ලංකා යුද හමුදාව සහ නාවික හමුදාව අතර හෝමාගම දියගම මහින්ද රාජපක්ෂ ක්‍රීඩාංගණයේ දී ඊයේ (14) පැවති අන්තර් සමාජ ලීග් රග්බි තරගයක දී නාවික හමුදා කණ්ඩායමේ ක්‍රීඩකයන් කිහිප දෙනකු තම කණ්ඩායමේ හිටපු නායකයාට සහයෝගය දැක්වෙන අත්පටි පැළඳ ක්‍රීඩා කළ බවටයි වාර්තා පළ වී තිබුණේ.
යෝෂිත රාජපක්ෂ නාවික හමුදා රග්බි කණ්ඩායමේ හිටපු නායකයා වන අතර ඔහුගේ අංකය වී තිබුණේ 07යි. තම කණ්ඩායමේ හිටපු නායකයාට සහයෝගය දැක්වීම පිණිස නාවික හමුදා රග්බි කණ්ඩායමේ ක්‍රීඩකයන් කිහිප දෙනකු ක්‍රීඩා කර ඇත්තේ ‘YO 07‘යනුවෙන් සඳහන් අත් පටි පැළඳ ගෙනයි.
යෝෂිත රාජපක්ෂ අත්අඩංගුවට පත් වන තෙක්ම නාවික හමුදා රග්බ් කණ්ඩායම නියෝජනය කළේය.
- BBC-
