ඒ වෙනුවෙන් පසුගිය දින කිහිපයේ මන්ත්‍රීවරයා ශ්‍රීලනිපයේ මෛත්‍රී පාර්ශවයේ ප්‍රබලයින් කිහිපදෙනෙකු සමඟ රහස් සාකච්ඡා කර ඇති අතර එම සාකච්ඡා සාර්ථක වී ඇති බවද වාර්තා වෙයි. ඒ අනුව මෛත්‍රී පාර්ශවය දැනුම්දෙන තීරණාත්මක අවස්තාවකදී මහින්දානන්ද මන්ත්‍රීවරයා ජනාධිපතිවරයාට සහය පළකර ආණ්ඩුවට එක්වීමට නියමිතව ඇත.
මේ පිළිබඳ මහින්දානන්ද අලුත්ගමගේ මන්ත්‍රීවරයා සිය හිතවතුන් කිහිපදෙනෙකු සමඟද පවසා ඇති අතර තමන්ගේ මේ තීන්දුවට හේතුව බැසිල් රාජපක්ෂගේ ඩීල් දේශපාලනය බවද එහිදී පවසා ඇත.
වැඩිදුරටත් වාර්තා වන අන්දමට මහින්දවාදීන්ගේ මුලිකත්වයෙන් ගොඩනැගීමට නියමිත නව දේශපාලන පක්ෂයේ ප්‍රධානියා ලෙස පත්කොට තිබෙන්නේ බැසිල් රාජපක්ෂ වන අතර මහින්දානන්ද දිගින් දිගටම ඊට විරුද්ධව පෙනීසිට ඇත. ඒ පිළිබඳ පෞද්ගලිකව මහින්ද රාජපක්ෂව දැනුවත් කරන්නට ඔහු කටයුතු කර ඇති නමුත් මහින්ද ඒ ගැන එතරම් තැකීමක් සිදුකර නැත.
පසුබිමේ බැසිල් තමන්ට එරෙහිව ඇති චෝදනා වලින් නිදහස් වීම සඳහා එක්සත් ජාතික පක්ෂය සමඟ දැමු ඩීල් එකද ශ්‍රීලනිප මන්ත්‍රී මහින්දවාදී කණ්ඩායම හෙළිකර ගන්නේ ඔය අතරතුරය. ඒ දැනගත් විගස ශ්‍රීලනිප මහින්දවාදී මන්ත්‍රී කණ්ඩායම අදාළ කාරණය ගැන පෞද්ගලික මට්ටමින් සාකච්ඡා කර ඇති අතර එහිදී මහින්දානන්ද මන්ත්‍රීවරයා ගෙන ඇති ස්ථාවරය වී ඇත්තේ මහින්ද ඇතුළු සහෝදර සමාගම එක්සත් ජාතික පක්ෂයේ පිහිටෙන් පව් කමාකර ගැනීමේ සුදානම හමුවේ තවදුරටත් ආණ්ඩු විරෝධයක සිට කටයුතු කිරීම අවධානම් සහගත බවත් එසේ කළහොත් මහින්දගේ පවුත් තමන්ගේ කරපිටින් යාමට ඉඩ ඇති බවය.
මහින්දානන්දගේ මේ ස්ථාවරය පසුව රාජපක්ෂ සහෝදරයින්ගේ කනට ගොස් ඇති අතර ඔවුන් එතැන් පටන් සුක්ෂමව ඔහුව තීරණාත්මක දේශපාලන කටයුතු වලින් ඈත් කර ඇත.
