' අපි පසුගියදා එක්සත් ජාතීන්ගේ මානව හිමිකම් කොමිසමේ 37 වැනි සැසිවාරයට සහභාගි වුණා. මේ සැසිවාරයේදී තමයි ලංකාව පිළිබඳව විශේෂ ප්‍රකාශයක් කළේ මානව හිමිකම් කොමසාරිස්වරයා. ඒ ප්‍රකාශයෙන් කිව්වේ 30/1 යෝජනා නිර්දේශ යම්තාක් දුරට ඉටුකිරීම සම්බන්ධයෙන් සතුටුවන බවයි. නමුත් අනික් කාරණා ඉටුනොකිරීම සම්බන්ධයෙන් කනස්සල්ලට පත්වෙන බවත් ප්‍රකාශ කළා.
30/1 යෝජනාව ක්‍රියාත්මක කිරීම සම්බන්ධයෙන් අපි බැඳී සිටිනවා. මොකද අපි එයට අනුග්‍රහය දැක්වුවා. අපි අද ස්වාධීන රටක් නෙවේ. අතුරුදන් වීමේ කාර්යාල පනත විවෘත කරලා තිබෙනවා. දෙමුහුන් අධිකරණ ඇතිකරලා තිබෙනවා. බලහත්කාරයෙන් අතුරුදන් කිරීමේ පනත සම්මත කරලා තිබෙනවා. දකුණු ආසියාවේ කිසිම රටක් එම පනත නීතිගත කරලා නැහැ. ඒ වගේම ව්‍යවස්ථා වෙනසක් පිළිබඳව කතා කරනවා. ඒ සඳහා ජනවරමක් නැහැ මේ ආණ්ඩුවට. දෙමළ බෙදුම්වාදී කොටි ත්‍රස්තවාදීන්ට අවශ්‍ය නිසයි මේ දේවල් සිදුකරන්නේ.
ඒ වගේම සංක්‍රාන්ති යුක්තිය ඉටුකළ යුතුයි කියන දෙයක් මෙහි ඇතුළත්. සංක්‍රාන්ති යුක්තියක් ගේන්න පුළුවන් වෙන්නේ අවුරුදු ගණනාවක් පුරා ප්‍රජාතන්ත්‍රවාදය නැතිව මානව හිමිකම් කඩකළ රටවලටයි. මොකද ක්‍රම ක්‍රමයෙන් තමයි ඒ රටවලට සාමය උදාවෙන්නේ. අපේ රටට එහෙම දෙයක් අවශ්‍ය වෙන්නේ නැහැ. අපේ රට ප්‍රජාතන්ත්‍රවාදී රටක්. අපට එය බලපාන්නේ නැහැ. මේ 30/1 යෝජනාවේ තිබෙනවා. දෙමුහුන් අධිකරණයකට යනවා කියලා. නමුත් ජනාධිපතිවරයා දෙමුහුන් අධිකරණයකට යන්නේ නැහැ කියලා ප්‍රකාශ කරලා තිබෙනවා. ඒ නිසා අපි මේ සම්බන්ධයෙන් මේ සැසිවාරයේදී පෙත්සමක් ඉදිරිපත් කළා. මේ යෝජනාවලට සහාය දක්වපු මංගල සමරවීර ඇමැතිවරයා ඒ දේ කළේ පාර්ලිමේන්තුවේ හා ජනාධිපතිවරයාගේ අනුදැනුමකින් තොරවයි.'
