2009 දී ආසියානු සූරතාව දිනූ කණ්ඩායමේ පුහුණුකාරිනිය වූ තිලකා ජිනදාසව ලාංකේය දැල්පන්දු ක්ෂේත්‍රයෙන් පළවා හළ අතර ඉන්පසු එක වතාවක් හෝ ආසියානු සූරියන් වීමට ලංකාවට අවස්ථාව නොලැබිණ.එහි වගකීම භාරගත යුත්තේ එවකට හිටි , පක්ෂග්‍රාහී , අධිමානී සහ උද්ධච්ඡ දැල්පන්දු පුහුණුකාරිනියන් ය. පොර කිකිළියන් සේ එකිනෙකා කොටා ගනිමින් ක්‍රීඩිකාවන්ට අපහාස කළ , ඕපා දූප පැතිරවූ , විශ්‍රාම යා යුතු වයසේදී ද තනතුරු වලට කෑදරකම් කරමින් දැල්පන්දු පරිපාලනයේ එල්ලී සිටි නොහික්මුණු ගැහැණුන් රොත්තය.
2018 දී තිලකා ජිනදාස බෘනායි කණ්ඩායම අතහැර නැවත පැමිණ කණ්ඩායම භාරගෙන යළිත් වතාවක් ආසියානු කිරුළ ලංකාවට දිනා දුන්නේ දෛවයේ සරදමක් ලෙසිනි.
තිලකා ;
ඔබ , ඔබ යටතේ සිටි ක්‍රීඩිකාවන් සියලු දෙන සම්බන්ධව ගෞරවනීය ලෙස අදහස් දැක්වූවාය. තමා යටතේ සිටින්නේ තමා වන්ම , යොවුන් ගැහැණු දරුවන් කණ්ඩායමක් බව මැනවින් වටහාගෙන ඔවුන්ගේ ආත්ම ගෞරවය සුරැකෙන ආකාරයට කණ්ඩායම පිළිබඳ අදහස් දැක්වූවා විනා ගොසිප් මාධ්‍යයන්ට විහිළු කටගැස්ම සපයන පුහුණුකාරිනියක් නොවූවාය. වචනයෙන් පරිසමාප්ත අර්ථයෙන්ම ඔබ කාලාන්තරයකට පසු ශ්‍රී ලාංකේය දැල්පන්දුව තුළ දුටු ස්වයං විනයක් සහ පරිණත බවක් ඇති බුද්ධිමත් ගැහැණියක ලෙස කටයුතු කළාය. තිලකා ජිනදාස !
ආසියානු සූරතාව දිනා දීමේ කාරණාව අමතක කර පසුගිය කාලවකවානුව පුරා දැල්පන්දු පරිපාලනයේ නොහික්මුණු ගැහැණු නිසා පීඩාවට සහ අසාධාරණයට පත් දැල්පන්දු ක්‍රීඩිකාවන් වෙනුවෙන් මේ උත්තමාචාරය පිළි ගන්න. ආසියානු සූරතා කවදා හෝ දිනාගත හැකිය. ඔබ කාන්‍තා කණ්ඩායමක ආත්ම ගෞරවය සමග ආසියානු සූරතාව දිනා දීමට සමත් වූවාය.
චතුරංගි ජයසූරිය ; දර්ශිකා අබේවික්‍රම ඇතුළු සමස්ත කණ්ඩායමට අපගේ ගෞරවනීය සුබ පැතුම්. විශේෂයෙන්ම අත හැර සිටි දැල්පන්දු පිටියට යළි පිවිස , දැල්පන්දුව නිසා උපන් ගමෙන් ඈත්ව හුදෙකලා ජීවිතයක පීඩා විඳිමින්, නුපුරුදු සංස්කෘතියක ගැටීමේ ආතතිය විඳින තර්ජනී සිවලිංගම්ට ගෞරවනීය ආදරය පුද කරමි. ආසියානු කුසලානයට මග පෑදු ජෙයන්ති සෝමසේකරම් ඇතුළු වත්මන් පරිපාලනය වෙත උණුසුම් සුබ පැතුම් සහ තුතිය පිරි නමමි. ඔබගේ සහාය ද අමතක කළ නොහැකිය
අවසාන වශයෙන් සමස්ත දැල්පන්දු කණ්ඩායමටම මෙසේ පවසමි !
ඔබ අපේ , මේ පුංචි රටේ ෆීලිංස් වලට හර්ට් කළේ නැත. බොහොම ස්තුතියි.
- සහන් කසීර වික්‍රමසිංහ -
