ආණ්ඩුක්‍රම ව්‍යවස්ථාව යටතේ සිය වගකීම් දරන්නා වූ සියලු රටවැසියාගේ යුතුකම වනුයේ පක්ෂ දේශපාලනය හෝ පුද්ගල සබැඳියාව නොසළකා අද දවසේ රට පිළිබඳව ස්වදේශානුරාගයෙන් සිතා මවුබිමෙහි නිදහසත් ප්‍රජාතන්ත්‍රවාදයේ සුරක්ෂිත භාවයත් වෙනුවෙන් පෙනී සිටීම බව ද නිවේදනයක් නිකුත් කරමින් මේ බව කරූ ජයසූරිය මහතා පෙන්වා දෙයි.
ජනාධිපතිවරයාගේ ක්‍රියාවන් හී නීත්‍යානුකූල භාවය තීරණය කිරීමෙහි පාර්ලිමේන්තුව සතු වගකීම සහ අයිතිය ජනාධිපතිවරයා විසින් වලක්වනු ලැබීම හේතුවෙන් පාර්ලිමේන්තුව විසුරුවාලීම පිළිබදව අර්ථ නිරුපනයක ලබ ගත යුත්තේ ශ්‍රේෂ්ඨාධිකරණයෙන් යනුවෙන් කථානායක වරයා දැනුම් දී තිබේ.
පාර්ලිමේන්තුව නියෝජනය කළ විවිධ පක්ෂ නායකයන් සිදු වී ඇති පාර්ලිමේන්තුව විසුරුවාලීමට එරෙහිව ශ්‍රේෂ්ඨාධිකරණය ඉදිරියේ එය අභියෝගයට ලක් කරන බව තමා දැන සිටි බව කථානායක කරූ ජයසූරිය මහතා එම නිවේදනයේ වැඩිදුරටත් දැක්වෙයි.
මහජනතාව තමන් නියෝජනය කරනු සඳහා තෝරා පත්කළ පාර්ලිමේන්තු මන්ත්‍රීවරුන්ගේ අයිතිය බලෙන් පැහැරගැනීම, පාර්ලිමේන්තුවේ භාරකරු ලෙස ගතවූ දෙසතිය තුළ තමා විමසිල්ලෙන් නිරීක්ෂණය කළ බව ද එම නිවේදනයේ දැක්වෙයි.
විධායකය, ශ්‍රී ලංකා ස්වෛරීත්වයේ යාන්ත්‍රණය වන පාර්ලිමේන්තුව ඕනෑකමින්ම නොසලකා හැරීම ජනතා නිදහසට හා අයිතියට බරපතළ අවදානමක් වනු ඇති බව ද කථානායකවරයා සඳහන් කරයි.
මෙවන් බරපතළ පසුබිමක ආණ්ඩුක්‍රම ව්‍යවස්ථාව ආරක්ෂා කිරීමෙහි දිවුරුම් දී ඇති සියලු රජයේ සේවක පිරිස් වෙත තමන් දුන් එම දිවුරුම පිළිබඳ යළිත් සිහිපත් කරන ලෙස ද කථානායකවරයා අවධාරණය කරයි.
සියලු දෙනාගේ පරම බැඳීම පවතිනුයේ හුදෙක් ආණ්ඩුක්‍රම ව්‍යවස්ථාව වෙත බවත්, මවුබිමේ උත්තරීතර නීතිය වන ව්‍යවස්ථාව පිළිබඳ අප සතු වගකීම රාජ්‍ය සේවය මෙන්ම පොලීසිය හා අධිකරණයේ ස්වාධීනත්වය පිළිබඳ අපගේ වගකීම මතකයේ තබාගන්නා ලෙස ද කථානායකවරයා මෙහිදී අවධාරණය කර තිබේ.
විධායකය හමුවේ පෙනීසිට පාර්ලිමේන්තුවේ අයිතිවාසිකම් ආණ්ඩුක්‍රම ව්‍යවස්ථාවේ උත්තරීතර භාවය, හා ජනතා පරමාධිපත්‍යය ආරක්ෂා කිරීම තමා ලද වරප්‍රසාදයක් වන බවත්, ඉහත සඳහන් කළ තමාගේ ක්‍රියාකාරකම් පිළිබඳ කිසිඳු පැකිලීමකින් තොර කවර ආකාරයේ වුව ප්‍රතිවිපාකයකට මුහුණ දීමට තමා සූදානම් බවද එහි වැඩිදුරටත් දැක්වෙයි.
