පිතිකරුවකු ලෙස දිගින් දිගටම අසාර්ථක වීම මත දිනේෂ් චන්දිමාල් දකුණු අප්‍රිකාව සමග පැවැති තරගාවලියට නම් නොකෙරුණු බැවින් ඔහුව ශ්‍රී ලංකා ඒ කණ්‌ඩායමේ එංගලන්ත තරග සංචාරය සඳහා සහභාගිකරවනු ලැබීය. එහිදී එංගලන්ත ලයන්ස්‌ පිල සමග පැවැති තරගයේදී නොදැවී ලකුණු 119 ක්‌ වාර්තා කරමින් ශ්‍රී ලංකා ඒ පිල ජයග්‍රහණය කරා රැගෙන යැමට චන්දිමාල් සමත්වූවේය.
කණ්‌ඩායමට එක්‌ව සිටින අනෙක්‌ ක්‍රීඩකයා වන තිසර පෙරේරා, දකුණු අප්‍රිකාව සමගින් වූ පළමු එක්දින තරග 2 සඳහා වන කණ්‌ඩායමට නම් කර සිටියද තරගයක්‌ නියෝජනය කිරීමේ අවස්‌ථාව අහිමිවිය. අදාළ තරගාවලිය අතරතුර තිසර පෙරේරාගේ වෛද්‍යවරයා විසින් ඔහුට මානසික ආතතියක්‌ ඇති බවට වාර්තා ඉදිරිපත් කිරීම මත තෙවැනි තරගය සඳහා නම් කරන ලද කණ්‌ඩායමට තිසරගේ නම ඇතුළත් නොකිරීමට තේරීම් කමිටුව පියවර ගනු ලැබීය.
පිතිකරුවකු ලෙස අසාර්ථක වී සිටින ආරම්භක පිතිකරු කුසල් පෙරේරාටද සිය ස්‌ථානය අහිමිවී තිබීම විශේෂත්වයක්‌ වේ. ඊට අමතරව දකුණු අප්‍රිකාව සමග පැවැති තරගාවලියේදී කණ්‌ඩායමට එක්‌වී සිටි ඩිල්රුවන් පෙරේරා, අජන්ත මෙන්ඩිස්‌ සහ කිත්රුවන් විතානගේ යන ක්‍රීඩකයන්ට ස්‌ථාන අහිමිවී තිබෙන අතර අතර ඒ වෙනුවට ධම්මික ප්‍රසාද්, සීක්‌කුගේ ප්‍රසන්න සහ සුරාඡ් රන්දීව් කණ්‌ඩායමට කැ`දවා තිබේ.
මේ අතර එක්දින තරගාවලියට ප්‍රථම පාකිස්‌තානු පිලට හිමි පළමු සහ එකම පුහුණු තරගය සඳහා වන ශ්‍රී ලංකා ශ්‍රී ලංකා ක්‍රිකට්‌ සභාපතිගේ කණ්‌ඩායමේ නායකත්වය උපනායක ළහිරු තිරිමාන්නව පත් කර තිබේ. මෙම තරගය අද (20 දා) මොරටුව ද සොයිසා ක්‍රීඩාංගණයේදී පැවැත්වෙනු ඇත.
ශ්‍රී ලංකා එක්දින කණ්‌ඩායම / ඇන්ජලෝ මැතිව්ස්‌(නායක), ටී. එම්. ඩිල්ෂාන්, උපුල් තරංග, කුමාර් සංගක්‌කාර, මහේල ජයවර්ධන, දිනේෂ් චන්දිමාල්, අශාන් ප්‍රියන්ජන්, ළහිරු තිරිමාන්න(උප නායක), ලසිත් මාලිංග, නුවන් කුලසේකර, ධම්මික ප්‍රසාද්, රංගන හේරත්, සීක්‌කුගේ ප්‍රසන්න, සුරාඡ් රන්දීව්, තිසර පෙරේරා.
පුහුණු තරගය සඳහා නම් කරන ලද කණ්‌ඩායම / ළහිරු තිරිමාන්න(නායක), ටී. එම්. ඩිල්ෂාන්, ධනුෂ්ක ගුණතිලක, දිනේෂ් චන්දිමාල්, අශාන් ප්‍රියන්ජන්, කිත්රුවන් විතානගේ, චතුරංග ද සිල්වා, සුරාඡ් රන්දීව්, තිසර පෙරේරා, ළහිරු ගමගේ, දුෂ්මන්ත චමීර, අනුක්‌ ප්‍රනාන්දු, දසුන් චානක, චතුරංග කුමාර, ෂෙහාන් ජයසූරිය.
(චමිල කරවිට)
සංචාරක පාකිස්‌තානු ක්‍රිකට්‌ කණ්‌ඩායම සමග එළැඹෙන 22 වැනිදා සිට ආරම්භ වන එක්දින තරගාවලියේ පළමු තරග 2 සඳහා නම් කරන ලද ශ්‍රී ලංකා කණ්‌ඩායමට දිනේෂ් චන්දිමාල් සහ තිසර පෙරේරාව නම් කිරීමට තේරීම් කමිටුව පියවර ගෙන තිබේ.
