අගමැති රනිල් වික්‍රමසිංහට එරෙහිව ඒකාබද්ධ විපක්ෂයේ මූලිකත්වයෙන් ගෙන ඒමට නියමිත විශ්වාසභංග යෝජනාව සම්මත වුවහොත් අගමැතිධුරය සඳහා මහින්ද රාජපක්ෂව නම් කිරීම ස්ථිර වශයෙන්ම ජනාධිපති මෛත්‍රීපාල සිරිසේනට සිදුවනු ඇති බව ඒකාබද්ධ විපක්ෂ තොරතුරු මාර්ග පවසයි. මේ වෙනුවෙන් ඇමැති නිමල් සිරිපාල හෝ දිනේෂ් ගුණවර්ධන පත් කළ යුතු බවට ශ්‍රීලනිපයෙන් යෝජනා ඉදිරිපත්ව තිබුණද එම අවදානම් සහගත පත් කිරීම් සිදු කිරීමට මහින්ද රාජපක්ෂ කිසිසේත් එකඟ වෙන්නේ නැති බවත් ඔවුන් පෙන්වා දෙයි.

ඊයේ (17) අලුයම තලවතුගොඩ කීල්ස් සුපිරි වෙළඳ සැල ඉදිරිපිට කිඹුලා ඇලට වැටී අනතුරට පත්වූ මෝටර් රථය ජනාධිපතිවරයාගේ පුතා වූ දහම් සිරිසේනට අයත් බවත් අනතුර සිදුවූ අවස්ථාවේ ඔහු එය පදවා ඇති බවට පළවූ පුවත සම්බන්ධව විශේෂ විමර්ශනයක් සිදුකිරීමට ජනාධිපතිවරයා පොලීසියට නියමකර ඇති බව මෛත්‍රීපාර්ශ්වයේ හිතවත්කම් ඇති වෙබ් අඩවි වාර්තා කරයි.

එක්සත් ජාතික පක්ෂයේ නිලතල වෙනස් කිරීම ලබන 31 වන දිනට පෙර සිදුවනු ඇති බව තරුණ කටයුතු ඇමැති සාගල රත්නායක අද දින මාධ්‍යෙව්දීන් හමුවේ පැවැසීය. මේ වෙනුවෙන් අගමැති රනිල් වික්‍රමසිංහ කමි‍ටුවක් පත් කර ඒ සම්බන්ධයෙන් යෝජනා සාකච්ඡාවට ගැනෙමින් පවතින බවත් එම කමි‍ටුව නිවාස ඇමැති සජිත් ප්‍රේමදාසගේ ප්‍රධානත්වයෙන් මේ වන විට කටයුතු කරමින් තිබෙන බවත් පවසයි.

තේ වගාව ඇතුලු වානිජ වගාවන් හී වල් නාශකයක් ලෙස බහුලව යොදා ගන්නා ‘ග්ලයිපොසේට් නැමැති වල් නාශකය ඇතුලු තවත් වල් නාශක කිහිපයකට පනවා තිබූ තහනම ඉවත් කිරීමට ජනාධිපතිවරයාගේ ප්‍රධානත්වයෙන් පවතින ජාතික ආර්ථික කමි‍ටුව තීරණය කර තිබේ.