සිංගප්පූරු ගුවන් සේවයට අයත් යානයක් මෙලෙස අනතුරට ලක්ව ඇති අතර විදෙස් වාර්තා සඳහන් කරන්නේ අනතුරෙන් එක් පුද්ගලයෙකු මිය ගොස් ගුවන් මගීන් 71 දෙනෙකු තුවාල ලබා ඇති බවයි. මෙලෙස අවාසනාවන්ත ලෙස මියගොස් ඇත්තේ 73 හැවිරිදි බ්‍රිතාන්‍ය ජාතිකයෙකි. මැලේසියාව, එක්සත් රාජධානිය, නවසීලන්තය, ස්පාඤ්ඤය, එක්සත් ජනපදය සහ අයර්ලන්තය යන රටවල පුරවැසියන් මෙලෙස තුවාල ලබා තිබේ.

ගුවන් යානයේ මගීන් 211 ක් හා කාර්ය මණ්ඩලයේ 18 දෙනෙකු ගමන් කර තිබු අතර ඉන් ගුවන් මගීන් 7 දෙනෙකුගේ තත්ත්වය බරපතළ බවද විදෙස් මාධ්‍ය වැඩිදුරටත් වාර්තා කර තිබේ.

ගුවන් යානය උඩුගුවනේ වායු රික්තක කලාපයක, එසේත් නැත්නම් එයා පොකට් එකකට මැදිව මිනිත්තුවක් වැනි කාලයකදී අඩි 6000ක් පහතට පැමිණ ඇති බව වාර්තා වේ. ඇතිවූ මෙම කැලඹිලිසහගත තත්ත්වය හේතුවෙන් මෙම අනතුර සිදුවූ බව වාර්තා වේ.

එංගලන්තයේ ලන්ඩන් නුවර සිට පැමිණෙමින් තිබූ මෙම ගුවන් යානය මෙලෙස අනතුරට ලක්ව ඇත්තේ, බෙංගාලබොක්කට ඉහළින් පියාසර කරමින් සිටින අතරතුරයි.

ගුවන් යානය තායිලන්තයේ බැංකොක් නුවරට හදිසියේ ගොඩබස්වා ඇති අතර තුවාල කරුවන්ට ප්‍රතිකාර ලබා දීම අරඹා ඇති බව විදෙස් වාර්තා සඳහන් කරයි.

ගුවන්යානය හදිසි ගොඩබෑමකට අවසර ඉල්ලා ඇති අතර ගොඩබෑමට මිනිත්තු 10කට පෙර මෙම අනතුර සිදුව ඇති බව විදෙස් වාර්තා සඳහන් කරයි.

මගීන් 211 දෙනාගෙන් 131 දෙනෙකු පසුව සිංගප්පූරු ගුවන් සේවයට අයත් වෙනත් යානයකින් ගමනාන්තය වෙත යොමුකර තිබේ.

-P.M