එම වාර්තා අනුව නරේන්ද්‍ර මෝදි මහතා ගමන් ගත් ගුවන් යානය සිද්ධිය වීමට පැය 2කට පෙර එම ස්ථානයෙන් අහසේ පියාසර කර ඇති බවත් පුටින් මහතා ගමන් ගත් ගුවන් යානය ඛේදවාචකය සිදුවීමෙන් පැයකට පසු ගමන් කොට ඇති බව සඳහන් වෙයි.

නෙදර්ලන්තයේ ඇම්ස්ටර්ඩෑම් සිට මැලේසියාවේ ක්වාලාලාම්පුර් බලා ගමන් ගනිමින් සිටියදී මගීන් හා කාර්ය මණ්ඩලය 295 දෙනකු රැුගෙන යමින් සිටින අතරතුර නැගෙනහිර යුක්රේන අහසේදී එල්ල වූ මිසයිල ප‍්‍රහාරයකින් පසුගිය 17 වැනිදා බෝයිං 777 මගී ගුවන් යානය ෂැක්ටර්ස් ප‍්‍රදේශයට කඩාවැටුණි.

‘රෂියා ටුඬේ’ වාර්තාවක් අනුව යුක්රේන හමුදා විසින් එල්ල කරන ලද ප‍්‍රහාරය පුටින් මහතා ගමන් ගත් ගුවන් යානය ඉලක්ක කොට ඇති බවට සැකයක් ඉස්මතු වී තිබේ. ඛේදවාචකයට ලක්වූ මලයාසියානු ගුවන් යානයත් පුටින් මහතා ගමන් ගත් ගුවන් යානයත් බාහිර පෙනුමෙන් එක හා සමාන බව තවත් විදෙස් වාර්තාවක සඳහන්ය.

මේ අතර, ඇමෙරිකානු ජනාධිපති බරක් ඔබාමා මහතා සිද්ධිය සම්බන්ධව ස්වාධීන පරීක්ෂණයක් ඉල්ලා ඇති අතර, එම පරීක්ෂණය පැවැත්වීමට සිද්ධිය වූ ස්ථානයට පරීක්ෂණ කණ්ඩායමකට යාමට අවසර දිය යුතු බව අවධාරණය කොට ඇත.

අනතුරට පත් මැලේසියානු ගුවන් සේවයට අයත් බෝයිං 777 යානයේ නෙදර්ලන්ත ජාතිකයන් 154ක්, මැලේසියානුවන් 43ක් (බිලිඳුන් දෙදෙනෙක් ඇතුළුව), ඕස්ටේ‍්‍රලියානු 27ක්, ඉන්දුනීසියානුවන් 12ක් (බිලිඳකු ඇතුළුව), බි‍්‍රතාන්‍යයන් 9ක්, ජර්මානුවන් 4ක්, බෙල්ජියම් ජාතිකයන් 4ක්, පිලිපීන ජාතිකයන් 3ක්, කැනඩා ජාතිකයන් 3ක් හා හඳුනානොගත් විදේශිකයන් 41 දෙනකු සිටි බව තහවුරු වී තිබේ.

මේ අතර ඕස්ටේ‍්‍රලියාවේ මෙල්බර්න්හිදී පැවැත්වෙන ඒඞ්ස් සමුළුව සඳහා සහභාගි වන විදේශ නියෝජිතයන් 100 දෙනකු අනතුරට පත් මැලේසියානු ගුවන් යානයේ සිට ඇතැයි ඕස්ටේ‍්‍රලියානු විදේශ කටයුතු අමාත්‍ය ජූලි බිෂොප් විසින් තහවුරු කර තිබිණ. ඒඕස් රෝගය සම්බන්ධ විශේෂඥ වෛද්‍යවරයෙක් ද මෙම යානයේ ගමන්ගෙන තිබූ අතර ඔහු ද අනතුරින් ජීවිතක්ෂයට පත්ව තිබේ.

(රිවිර)