මාලදිවයින් මහජන ඡන්දයෙන් තේරුණු පළමුවන ජනාධිපතිවරයා වූ මොහමඩ් නෂීඩ් සතියකට පූර්වයෙන් අත් අඩංගුවට ගනු ලැබුණේ 2012 ඔහුගේ පාලන කාලයේදී ශ්‍රේෂ්ඨාධිකරණ නියෝගයක්ද නොතකමින් මහාධිකරණ ප්‍රධාන විනිසුරු හමුදා අත් අඩංගුවේ තබාගැන්මේ චෝදනාව යටතේය. මේ සිද්ධියෙන් ඇතිවු ජනතා විරෝධය හමුවේ නෂීඩ් ඉල්ලා අස්වීමෙන් පසු 2013 දී පැවැත්වූ මැතිවරණයෙන් පරාජයට පත්විය . දැන් ඔහු අත්අඩංගුවට ගෙන ඇත්තේ එරට ත්‍රස්ත මර්දන පනත යටතේය.
ඔහුගේ පක්ෂය වන මාලදිවයින් ප්‍රජාතන්ත්‍රවාදී පක්ෂයේ ඊවා අබ්දුල්ලා මන්ත්‍රීවරිය පවසා ඇත්තේ තවත් මිත්‍රශීලී පක්ෂයක් සමග එක්ව ඔවුන් නෂීඩ් මුදාහරින තුරු රාත්‍රි කාලයේ වීදි විරෝධතා දැක්වීමට තීරණය කර ඇති බවය. ඒ සමගම ලබන සතියේ පාර්ලිමේන්තු නව සැසිවාරය අරඹමින් ජනාධිපති යමීන් අබ්දුල් ගයුම් පවත්වන කතාවේදී පාර්ලිමේන්තු විරෝධතාවක් පැවැත්වීමට ද විපක්ෂය කටයුතු යොදා තිබේ.
ඉකුත් සිකුරාදා නෂීඩ් හිතවාදී කොටස් මාලේ අග නගරයේ වීදි පුරා විරෝධතා උද්ඝෝෂණයක් පවත්වා තිබිණ. නෂීඩ් නිදහස් කරනු යැයි එහිදී ඔවුහු හඬ නැගූහ.
තමා අත් අඩංගුවට ගැන්ම දේශපාලන අරමුණු ඉටුකර ගැන්මක් බව පවසන නෂීඩ් 2018 පැවැත්වීමට නියමිත ජනාධිපතිවරණයට පූර්වයෙන් සිය විරුද්ධවාදීන් විනාශ කිරීම ජනාධිපති ගයුම් ගේ අදිටන බව කියා සිටියි.
(dinamina)
