එල්.ටී.ටී.ඊ සංවිධානයේ නායක වේළුපිල්ලේ ප්‍රභාකරන් විසින් රජීව් ගාන්ධිට වාචික පොරොන්දුවක් දී තිබියදී තමාගේ සහයට ශ්‍රී ලංකාවට හමුදා ඛණ්ඩයක් එවන ලෙස එවක ජනාධිපති ජේ.ආර් ජයවර්ධන මහතා ඉන්දීය අග්‍රාමාත්‍යවරයාගෙන් ඉල්ලා තිබිණි.
අග්‍රාමාත්‍යවරයා ලැබූ වැරදි උපදෙස් හේතුවෙන් ඔහු ශ්‍රී ලංකාවට හමුදා ඛණ්ඩයක් එවීමට කටයුතු කළ බව හිටපු අමාත්‍ය නත්වාං සිං, ඉංග්‍රීසි නාලිකාවක් සමග පැවති සම්මුඛ සාකච්ඡාවකදී සඳහන් කළේය.
මෙලෙස ඉන්දීය හමුදා එවීමට කටයුතු කරනු ලැබුවේ කැබ්නට් මණ්ඩලයට හෝ නොදන්වා බැව් සිං පෙන්වාදෙයි.
එවක ඉන්දීය කොංග්‍රසය නියෝජනය කළ හිටපු අමාත්‍ය නත්වාර් සිං විසින් රචිත ස්වයංචරිතාපදාන කෘතිය වන One Life is Not Enough: An Autobiography (එක් ජීවිතයක් ප්‍රමාණවත් නෑ:ස්වයංචරිතාපදානයක්) හි මෙම කරුණු දැක්වෙන බැව් ඉන්දීය පුවත් සේවා උපුටා දක්වයි.
කෙසේ වෙතත් මේ පිළිබඳව තමන් අග්‍රාමාත්‍යවරයාගෙන් විමසනු ලදුව තත්ත්වය පාලනයෙන් ගිළිහෙන්නට යන බැවින් ඉතා ඉක්මනින් තමාගේ සහය අවශ්‍ය බව ජේ.ආර් ජයවර්ධන මහතා දන්වා ඇති බවත්, තමා දැනටමත් කණ්ඩායමක් පිටත්කර ඇති බවත් පැවසූ බව නත්වාර් සිං වැඩිදුරටත් කියා සිටියි.
මූලාශ්‍රය adaderana
