වර්තමානයේ දකුණේ පමණක් නොව උතුරු පළාතේ ද විරෝධතා පැවැත්වෙනවා. ඇතැම් අය ලබාදුන් නිදහස සීමාවකින් තොරව භුක්ති විදිනවා. රට හැදීමේ වැඩපිළීවෙල ඉදිරියටම දියත් කරනවා. 2015 වසර වන විට මමත් ජනාධිපතිවරයාත් සිටියේ නිර්පාක්ෂිකවයි. නමුත් පසුව ජනාධිපතිවරයා ශ්‍රී ලංකා නිදහස් පක්ෂයේ නායකත්වයට පත්වුනා. අපේ රජයට ශ්‍රී ලංකා නිදහස් පක්ෂයෙන් එකතු වුන අය අපටත් පහර ගැහුවා. ඔවුන් දුෂණයට, භීෂණයට කැමැති අය. ජනාධිපතිවරයාත් ඔවුන්ගේ පැත්ත ගත් නිසා අපි සමග ගැටුම් ඇති වුනා.” යැයි සෞඛ්‍ය, පෝෂණ හා දේශිය වෛද්‍ය අමාත්‍ය දොස්තර රාජිත සේනාරත්න මහතා පවසයි.
ජාතික සෞඛ්‍ය සේවා පොදු සංගමය සංවිධානය කළ උපහාර උත්සවයක් සෞඛ්‍ය, පෝෂණ හා දේශිය වෛද්‍ය අමාත්‍ය දොස්තර රාජිත සේනාරත්න මහතාගේ ප්‍රධානත්වයෙන් පේරාදෙණිය විශේෂිත ළමා රෝහලේ දී පසුගියදා පැවැත්විනි.
මෙහිදී සෞඛ්‍ය සේවාවට කළ මෙහෙවර අගය කරමින් එම සංගමය විසින් උපහාර තිළිණයක් සෞඛ්‍ය අමාත්‍යවරයාට පිරිනමන ලදි.
තව ද පේරාදෙණිය ළමා රෝහල සංවර්ධනය කිරිම සදහා දායක වූවන්ට සෞඛ්‍ය අමාත්‍යවරයා විසින් තිළිණ ප්‍රදානයක් ද සිදුකළ අතර, මෙම රෝහලේ හිටපු අධ්‍යක්ෂ නියෝජ්‍ය අධ්‍යක්ෂ ජනරාල් ඩී.ආර්.ඒ හේරත් මහතා විසින් සිය පෞද්ගලික ධනයෙන් මෙම රෝහලට ඇඳන් 13 ක් ද පරිත්‍යාග කරන ලදි.
මෙහිදී අදහස් දැක් වූ සෞඛ්‍ය අමාත්‍යවරයා -
“19 වන ආණ්ඩුක්‍රම ව්‍යවස්ථාවට වර්තමානයේ විරුද්ධ වන ජනාධිපතිවරයා එය ක්‍රියාත්මක කිරීමට කැපවී කටයුතු කළා. අතිවිශාල වැඩකොටසක් ඉටු කර තිබෙනවා. 2019 වසරේ විදේශ ණය ඩොලර් මිලියන 9600 ක් ගෙවීමට තිබුනා. විපක්ෂයේ අය හිතුවේ එම ණය ගෙවන්න බැරිවෙයි කියලා. රජය කඩා වැටෙයි කියලා. මෙම ණය මුදලෙන් සියයට 87 ක් තිබුනේ හිටපු ජනාධිපතිවරයාගේ කාලයේ ගත් ණය. එම ණය අරගෙන තිබුනේ වාණිජ පොලියට. ණය මුදල් ගෙවීමට විදේශීය සහයෝගය ලැබුනා. නැතිනම් ඛේදවාචකයකට ලක්වෙනවා. ජුලි මාසයේ දී ඇමරිකානු ඩොලර් මිලියන 1900 ක මුදල් ණය වශයෙන් ගෙවීමට තිබෙනවා. විපක්ෂය බලාගෙන ඉන්නවා එම ණය ගෙවා ගන්න බැරිව ආණ්ඩුව කඩා වැටෙන ආකාරය බලන්න. අර්බුදය ඇති කළෙත් එයාලගේ පාලන කාලයේ දී. අපි රජයේ දේපල විකිණීම නතර කර බද්දට ලබාදීමට කටයුතු කළා. මත්තල ගුවන්තොටුපල ඉන්දියාව සමග එකාබද්ධ ව්‍යාපාරයක් ලෙස පවත්වාගෙන යාමට අපි සාකච්ඡා ආරම්භ කර තිබෙනවා. රජයේ අඩුපාඩු තිබෙනවා. රජයේ සංවර්ධන වැඩවලට මෙන්ම ඇතැම් රාජකාරී කටයුතු වලට ද ඇතැම් නිලධාරීන් බාධා කරනවා. විගණන දෙපාර්තමේන්තුව ශක්තිමත් කළ අතර, තොරතුරු දැනගැනීමේ පනත ද රජය විසින් ඉදිරිපත් කළා.”
“රජයේ රෝහල්වල ආරම්භ කර ඇති දුප්පත් හිතවාදී සෞඛ්‍ය ප්‍රතිපත්තිය සාර්ථක කර ගැනීම සදහා විශේෂඥ වෛද්‍යවරුන්, වෛද්‍යවරුන් සහයෝගය ලබාදෙනවා. නමුත් වෛද්‍යවරුන් සුළු කොටසක් කෑගහලා එම වැඩපිළිවෙල කඩාකප්පල් කරන්න හදනවා. පෙත්සම් ගහනවා. විරෝධතා පවත්වනවා. රෝගීන්ට ප්‍රතිකාර නොකර හවසට පෞද්ගලික සේවයේ යෙදෙනවා. රෝගීන්ට ප්‍රතිකාර නොකරන ඇතැම් වෛද්‍යවරු තම පෞද්ගලික වෛද්‍ය සායනය අංග සම්පූර්ණව හදාගෙන දේශපාලන වැඩ කරනවා.”
මෙම අවස්ථාවට නියෝජ්‍ය අධ්‍යක්ෂ ජනරාල් ඩි.ආර්.ඒ හේරත්, මධ්‍යම පළාත් සෞඛ්‍ය සේවා අධ්‍යක්ෂ අර්ජුන තිළකරත්න, මහනුවර මහ රෝහලේ අධ්‍යක්ෂ සමන් රත්නායක, පේරාදෙණිය විශේෂත ළමා රෝහලේ අධ්‍යක්ෂ සේනක නවනැළිය, සංගමයේ උපදේශක නන්දන පුෂ්පකුමාර මහතා ඇතුලු සාමාජිකයින් රැසක් එක්ව සිටියහ.
