ඉන් පසුව යෝජනාව සාකච්ඡාවට ගැනීම පසුවට කල් දමා තිබේ. ඇමෙරිකානු ඩොලර් 35,000 ක උපරිමයකට යටත්ව තීරුබදු සහන යටතේ වාහන ආනයනය කිරිම සඳහා එම යෝජනාව සිදු කර තිබිණි.
ඇමැති වජිර අබේවර්ධන සඳහන් කර ඇත්තේ උතුරු පළාත් සභාවේ හැර අනෙකුත් පළාත් සභාවල හිටපු මැති ඇමැතිවරුන්ට තීරුබදු සහන යටතේ වාහන ආනයනය කිරිම වෙනුවෙන් එම යෝජනාව ඉදිරිපත් කළ බවය.
උතුරු පළාත් සභාවේ මැති ඇමැතිවරුන් 37 දෙනාට තීරු බදු සහන යටතේ වාහන ආනයනය සඳහා මීට පෙර බලපත්‍ර ලබාදී තිබිණු නමුත් අනෙකුත් පළාත් සභා මැති ඇමැතිවරුන් 418 දෙනෙකුට වාහන ආනයනය සඳහා පසුගිය වසර පහ තුළම අවසර නොලැබිණි.
කෙසේ නමුත් මේ වන විට කාලය හමාර වී තිබෙන පළාත් සභාවල හිටපු මන්ත්‍රී සභිකයන්ට වාහන තීරුබදු සහන ලබා දීම බැලු බැල්මටම විකාරයකි. අපරාධයකි. මන්ත්‍රී වරප්‍රසාදයක් ලෙස මෙම තීරු බදු සහනය ලබා දීම සිදු කළත් අදාල කාලයේදී ඊට කැබිනට් අනුමැතිය නොලැබීම ඒ අදාල කාලයට සම්බන්ධ ගැටලුවකි. ඊට දැන් උත්තර සෙවීම ඒ හිටපු මැති ඇමතිවරුන්ට මහජන මුදල් වැය කර මුල්‍යමය අල්ලසක් ලබා දීමකට වඩා දෙයක් වන්නේ නැත. මෙය මහජන දේපොළ කොල්ලයකි. තීරුබදු සහනය අනිවාර්යෙන්ම ලබා දිය යුතු මන්ත්‍රී අයිතියක් බවට නියමයක් නැත.
