එජාප නායක රනිල් වික්‍රමසිංහගේ අපේක්ෂාවද සජිත් ප්‍රේමදාස ඇතුලු එම බහුතර කණ්ඩායම අඩපණ කොට ජනාධිපතිවරණ අපේක්ෂකත්වය ලබා ගැනීම වෙයි. ඊට මහින්ද රාජපක්ෂගේද කැමැත්ත හිමිව තිබේ. ඒ වෙන කිසිවක් නිසා නොව රනිල් වික්‍රමසිංහ ජනාධිපතිවරණය ජයග්‍රහණය කළද තමන්ටත් තම පවුලේ සාමාජිකයන්ට එරෙහිව තිබෙන චෝදනා කිසිවක් සම්බන්ධයෙන් නීතිමය ආරක්ෂණය ඔහුගෙන් ලැබිය හැකි බැවිනි. සාමාන්‍යයෙන් රනිල් වික්‍රමසිංහ කවර බරපතල එදිරිවාදිකම් තිබුණත් සිය ප්‍රභූ පැලැන්තිය ආරක්ෂා කිරීම නියත වශයෙන්ම සිදු කරන පුද්ගලයෙකි. ඒ ඉතිහාසයේ සිටම ඔහු ඔප්පු කර තිබෙන දෙයකි. එසේම අනෙක් පසින් රාජපක්ෂ පවුලෙන්ද රනිල් පාර්ශ්වයේ ආරක්ෂාව සහතික කර තිබේ.
අද පාර්ලිමේන්තුව කල් තැබීමේ විවාද අවස්ථාවේදී පොදුජන පෙරමුණ නියෝජනය කරන කුරුණෑගල දිස්ත්‍රික් පාර්ලිමේන්තු මන්ත්‍රී ටී බී ඒකනායක, සජිත් ප්‍රේමදාසට එරෙහිව මුල්‍ය චෝදනාවක් ඉදිරිපත් කරනු ලැබීය.. ඒ පසුගියදා රවී කරුණානායකගේ අනු දැනුම ඇතිව ඔහුගෙන් වැ‍ටුප් ලබන මාධ්‍යකරුවන් කිහිපදෙනෙකු හරහා ප්‍රචාරය කරන ලද මධ්‍යම සංස්කෘතික අරමුදලේ රුපියල් කෝටි 1200 ක මුදල් අවභාවිතාවක් සිදුකොට ඇති බවට වන චෝදනාවය. මෙම චෝදනාව සම්බන්ධයෙන් මීට පෙර සජිත් ප්‍රේමදාස විසින් පිළිතුරු දී තිබූ නමුත් අද දිනයේ එය ටී බී එ්කනායක විසින් මතු කරනු ලැබුවේ රවී කරුණානායක විසින් ඒ සම්බන්ධ තොරතුරු ඇතුලත් ලිපි ගොනුවක් ටී බී ඒකනායක වෙත ලබා දී සහය ඉල්ලා සිටීම නිසා බව පාර්ලිමේන්තුවේ විපක්ෂ පාර්ශවයේ තොරතුරු මාර්ග පවසයි. මෙලෙස මුදල් අවභාවිතාවක් සිදුව තිබේ නම් එහි වගකීම සංස්කෘතික ආරමුදලේ ප්‍රධානින් වෙත එල්ල වන චෝදනාවකි. එහෙත් මෙම අරමුදලේ සභාපතිවරයා වන්නේ අගමැති රනිල් වික්‍රසිංහය. එහෙත් එම කාරණය වසංකර සංස්කෘතික ඇමැතිවරයා වන සජිත් ප්‍රේමදාස වෙත එක එල්ලේම මෙම චෝදනාව බැර කිරීමට රවී කරුණානායක දැඩි උත්සාහයක නිරතව සිටී . අද මේ වෙනුවෙන් ටි බී එ්කනායකගේ සහය ගත්තේ ඔහු රාජපක්ෂ පාලනයේ හිටපු සංස්කෘතික ඇමැතිවරයා වීමත් හේතු කොටගෙනය.
මේ අතර මීට දින කිහිපයකට පෙර එජාපයේ වජිර අබේවර්ධන ඇමැතිවරයා විසින් පොදුජන පෙරමුණේ මන්ත්‍රී මහින්දානන්ද අලුත්ගමගේ හමුවී තවත් ලිපි ගොනුවක් බාර දී තිබිණි. ඒ ඇමැති අජිත් පී පෙරේරා සම්බන්ධව ගොතන ලද චෝදනා සහිත ලියවිලි කිහිපයකි. එයත් පොදුජන පෙරමුණ විසින් රනිල් රැකීම වෙනුවෙන් යොදාගනු ඇත.
කෙසේනමුත් එජාප ඉතිහාසයේ තවත් කැතම කැත පරිච්ඡේදයක් ලිවීමට රනිල් වික්‍රමසිංහ රවී වජිර අඛිල ආදී එම පාර්ශ්වයේ පිරිස මේ වන විට දරමින් තිබෙන උත්සාහය අවසන් වනු ඇත්තේ එජාපයට ජනාධිපතිවරණයේ දරුණු පරාජයක් අත් පත් කර දෙමින් එය විනාශ කරලීමෙන් බව නම් දැන් පැහැදිලිය. පක්ෂ නායකත්වයට තිබෙන මල පෙරේතකමට ලංකාවේ දැවැන්තම දේශපාලන පක්ෂයත්, රටත් ජාතියත්, විනාශ කරගැනීම හැර මේ කුමන්ත්‍රණය ජය ගත්තද මෙම රනිල් කල්ලියට ඉතුරු වෙන වෙනත් ප්‍රතිපලයක් නැත. මන්ද අද පක්ෂයේ සාතිශය බහුතරය සජිත් ප්‍රේමදාස කේන්ද්‍රකරගෙන රොද බැඳගෙන සිටියදී ඊට එරෙහිව පක්ෂය විනාශ කරනවා හැර තවත් කළ හැකි කිසිවක් රනිල් පාර්ශ්වයට නැත..
