මෙම වෘත්තීය ක්‍රියාමාර්ග වෙනුවෙන් ඊයේ දිනයේදී ලෙඩ නිවාඩු දමන්නැයි සිය සංගමයේ සාමාජිකත්වයට පැවැසූ දේශිය ආදායම් දෙපාර්තමේන්තුවේ, දේශිය අදායම් තක්සේරු නිලධාරීන්ගේ සංගමයේ සභාපති වරයා එම වෘත්තීය ක්‍රියාමාර්ගයට සහභාගී නොවී තවත් නිලධාරීන් පිරිසක් සමඟ බෙන්තොට ප්‍රදේශයේ විනෝද චාරිකාවකට සභභාගී වී තිබේ. එහිදී බෙන්තොට හොටල් පරිශ්‍රයක් තුලදී ඔහු සමඟ ගිය ආදායම් දෙපාර්තමේන්තුවේ කළමනාකාර සහයකවරයකු මියගොස් ඇත. 34 හැවිරිදි ජීවන් අරුණ දයානන්ද නැමැති එක්දරු පියා මෙලෙස මියගොස් තිබේ. ඔහුගේ මළ සිරුර පිහිණුම් තඨාංගනයේ තිබුණු බවත් එය තමන් විසින් ගොඩට ගත් බවත් සංගමයේ සභාපති වරයා පොලීසියට පවසා ඇත.
කෙසේ නමුත් මෙය දියේ ගිලී සිදුවූ මරණයක් නොවන බවට මේ වන විට මූලික පරීක්ෂණ වලින් පෙන්වන බවත් දැනගැනීමට තිබේ. මරණයට හේතුව මෙතෙක් අනාවරණය වී නැති අතර මේ වන විට බලපිටිය පොලීසිය මේ සම්බන්ධයෙන් පරීක්ෂණ පවත්වමින් තිබේ.
මෙය සැක සහිත මරණයක් වූවත් මෙම කණ්ඩායමට නායකත්වය දුන් වෘත්තීය සමිති නායකයාව අත් අඩංගුවට ගැනීමට හෝ මෙතෙක් පොලිසිය කටයුතු කර නැත. ඔහු වත්මන් ආණ්ඩුවේ මුදල් විෂයට මීට පෙර සම්බන්ධව සිටි ඇමැතිවරයාගේ හිතවතකු වන බවත් ඒ අනුව පොලිසියට කළ යම් බලපෑමක් හමුවේ ඔහු නිදැල්ලේ පසුවන බවත් මේ සම්බන්ධයෙන් සොයා බැලු විට පොලිස් තොරතුරු මාර්ග පෙන්වා දෙයි.
ඒ කෙසේ නමුත් ඊයේ දිනයේදී රජයේ නිලධාරීන්ගේ වැටුප් විෂමතා වෙනුවෙන් සිදුකෙරුණු වෘත්තීය ක්‍රියාමාර්ගයට යැයි කියමින් ලෙඩ නිවාඩු දමා තමන්ගේ පෞද්ගලික විනෝදය වෙනුවෙන් එම කාලය යොදවා ගැනීම වගකිව යුතු වෘත්තීය සමිති නායකයකුට කළ හැකිද යන්න ගැටලුවකි. ජනතාවගේ බදුමුදලින් නඩත්තු වන මෙම නිලධාරීන් ඊයේ ගත් ක්‍රියාමාර්ගයෙන්ද රජයට අලාබයක් මිස යහපතක් වූයේ ද නැත.
