ඇයගේ දේහය අද සවස 3.30සිට  බොරුල්ල ජයරත්න මල්ශාලාවේ තැනපත් කර තැබෙන අතර හෙට (14දා) උදෑසන 10.00 ට පමණ දේහය මහජන ගෞරවය සඳහා ජාතික කලාභවන වෙත ගෙන යාමට නියමිතව ඇත.

වෙද හාමිනේ ලෙසින් 1987 වසරේ ටෙලි නාට්‍ය ක්ෂේත්‍රයට පා තබා ජනප්‍රියත්වයට පත් රෙබෙකා නිර්මලී අද අලුයම 02:00ට පමණ මහරගම පිළිකා රෝහලේදී අභාවප්‍රාප්ත විය. එක්දරු මවකවූ ඇගේ දියණිය ඈන්ය.මිය යන විට ඇය 49 වන වියේ පසුවූ රෙබෙකා නිර්මලී කාලයක් තිස්සේ ගැබ්ගෙල පිළිකාවකින් පීඩා විඳි බව මහරගම පිළිකා රෝහලේ නියෝජ්‍ය අධ්‍යක්ෂ්‍ය විශේෂඥ වෛද්‍ය වසන්ත දිසානායක මහතා මාධ්‍යය වෙත පවසා තිබුණි.

 
පිළිකා රෝග සුව කරන්නියක ලෙස වෙදහාමිනේ ටෙලි නාට්‍යයෙන් පේ‍්‍රක්ෂක හදවත් වැළඳගත් ඇය එම රෝගයටම ගොදුරුවී මියයාම එක් අතකින් දෛවෝපගත සිදුවීමකි.

අනුරාධපුරයෙන් කොළඹට පැමිණ ටෙලි ක්ෂේත‍්‍රයට එක්වූ රෙබෙකා ටෙලිනාට්‍ය 150 ක පමණත් චිත‍්‍රපට කිහිපයකත් රඟපා ඇති අතර සම්මාන වලින්ද ඇය පිදුම් ලබා ඇත.පසුගිය දා පැවැත්වූ රයිගම් ටෙලි සම්මාන උළලේ දී ජූරිය පිරිනැමූ විශේෂ කුසලතා සම්මානයක්ද ඇයට හිමි වූවාය.

වෑ දිය රැල්ල, සේක්කුගෙදර, ජීවිතය සුන්දරයි කප් සුවහස්කල්, රන්තලිය වලව්ව, මොණරතැන්න, අකාල සන්ධ්‍යා, මිණිපුර හටන, ආදරවන්තයෝ, නිසල දිය සසල විය, දඬුබස්නාමානය, කඩුළු තහංචිය, දිය සායම්,දෙදහක් යන නිර්මාණ තුලින් ඇය සිය රංගන කෞශල්‍යය විදහා පෑවාය.

"වෙද හාමිනේ" ටෙලි නාට්‍යය තුළින් කලා ලොවට ඇය ගෙනා ජයන්ත චන්ද්‍රසිරිගේම නිර්මාණයකම රෝගී වන්නට පෙර ඇයගේ අවසන් රංගනයද සටහන් කිරීම විශේෂ සිද්ධියකි.ලබන නොවැම්බර් 27 වන දින රෙබෙකා ඇගේ 50 වන ජන්ම දිනය සමරන්නට බලාපොරොත්තුවෙන් සිටි අතර එයට පෙර ඇයට ජීවිතයෙන් සමුගැනීමට සිදුවිය.