ඒ අනුව අගෝස්තු මස 1 වැනිදා ජනාධිපතිවරයාගේ ඇරයුමක් අනුව කුමාර සංගක්කාර සහ ලසිත් මාලිංග යන ක්‍රීඩකයන් ජනාධිපතිවරයා හමුවී ක්‍රිකට් ආරවුල ගැන දීර්ඝ ලෙස කරුණු දක්වා ඇත.
එහිදී එක් නිලධාරියෙකු ප්‍රවීණ ක්‍රීඩකයන් කිහිපදෙනෙකුට එරෙහිව දැඩි පීඩනයක් එල්ල කරන බව එම ක්‍රීඩකයන් පෙන්වා දී ඇත.
එකී පීඩනය තමන්ට දරා ගැනීමට නොහැකි බවත් මේ හේතුව නිසා තමන් ඇතුළු ක්‍රිකට් ක්‍රීඩකයන් පිරිසක් මේ වසර අවසානයේ ක්‍රිකට් ක්‍රීඩාවෙන් සමුගන්නා බවත් ඔවුන් ජනාධිපතිවරයාට දැනුම් දී ඇත.
මේ නිලධාරියා පිටුපස ජනපති පුතුන් වන නාමල් රාජපක්ෂ මන්ත්‍රීවරයා සහ යෝෂිත රාජපක්ෂ යන අය සිටීම මේ පීඩනය ප්‍රබලවීමට හේතුව බවත් මොවුන් අවධාරණය කර ඇත.
මේ පීඩනය කුමාර් සංගක්කාර, ලසිත් මාලිංග, මහේල ජයවර්ධනට අමතරව තිසර පෙරේරාට ද එල්ල වී ඇතැයි පැවසේ.
එහිදී ජනාධිපතිවරයා ක්‍රීඩකයන්ට පවසා ඇත්තේ ඔහු මෙම ප්‍රශ්නය විසඳා දෙන බවත් ක්‍රිකට් ක්‍රීඩාවෙන් ඉක්මනින් ඉවත් නොවන ලෙසත් ය. එම සාකච්ඡාව අතරවාරයේ ක්‍රීඩා අමාත්‍යවරයාට ද කතා කොට ජනාධිපතිවරයා බැන වැදී ඇති බව පැවසේ.
මෙලෙස චෝදනා එල්ලවනුයේ ක්‍රිකට් ආයතනයේ ලේකම් නිශාන්ත රණතුංග මහතාට වන අතර අප ඒ පිළිබඳව නිශාන්ත රණතුංග මහතාගෙන් විමසූ කල ඔහු පැවසුවේ සියලු චෝදනා බොරු බවත් ක්‍රීඩකයන් ක්‍රීඩා කළයුතු බවත් පරිපාලකයන් පරිපාලනය කරනු ඇති බවත් ය.
කෙසේ වෙතත් ඉතා ඉක්මනින් නිශාන්ත රණතුංග මහතා ක්‍රිකට් ආයතනයේ ලේකම් නිලයෙන් ඉවත් කිරීමට ජනාධිපතිවරයා ක්‍රියාකරනු ඇතැයි ක්‍රිකට් ආයතනයේ අභ්‍යන්තර ආරංචි මාර්ග ප්‍රකාශ කරයි. ක්‍රිකට් ආයතනයේ සභාපති ජයන්ත ධර්මදාස මහතා නොසලකා නිශාන්ත රණතුංග තම අභිමතයට ක්‍රියාකිරීම ද මේ අර්බුදයට හේතුවක් බව පැවසේ.
