ජාත්‍යන්තර ආරක්ෂක සමුළුව අමතමින් විදේශ කටයුතු අමාත්‍ය මහාචාර්ය ජී.එල්. පීරිස් මහතා පවසා ඇත්තේ 13 වැනි  ව්‍යවස්ථා සංශෝධනය යටතේ බලතල රැසක් ප්‍රමාණවත් ලෙස පළාත් සභාවලට බෙදා ඇති බවයි.

එබැවින් උතුරේ ජනතාව වෙනුවෙන් යමක් කිරීමට කිසිවක් නැතැයි කියා සිටීම මගින් උතුරු පළාත් සභාව කල්මරමින් සිටින බවද ඒ මහතා  පෙන්වා දුන්නේය.

විශේෂයෙන්ම පොලිස් බලතල හැර සෙසු සෑම බලයක්ම අවශ්‍ය ප්‍රමාණයකට ලබාදී ඇති බවත්, එබැවින් 13 වැනි සංශෝධනය ක්‍රියාත්මක කළ යුතු බවට යළි යළිත් පැවසීම පිළිගත හැකි කරුණක් නොවන බවත්, වඩා ප්‍රායෝගික වන්නේ පවතින දේ භාවිත කරමින් නිර්මාණශීලීව යමක් කිරීම බවත් විදේශ අමාත්‍යවරයා පවසා සිටියේය.

මේ අතර, පොලිස් බලතල සහ ඉඩම් බලතල උතුරු පළාත් සභාවට ලබාදිය නොහැකි බව උසස් අධ්‍යාපන අමාත්‍ය එස්.බී. දිසානායක මහතා ද පවසයි.

බදුල්ල - පස්සර ප‍්‍රදේශයේ ඊයේ පැවැති ජන හමුවකට එක්වෙමින් අමාත්‍යවරයා සඳහන් කළේ නැවතත් සන්නද්ධ ව්‍යාපාරයක් ඇති වීමේ ඉඩකඩ පවතින හෙයින් එවැනි බලතල ලබාදිය නොහැකි බවයි.