ශ්‍රී ලාංකිකයින්ගේ ඩිජිටල් සාක්ෂරතාවය වර්ධනය කිරීමත්, සන්නිවේදන සහ චින්තන කුලසලතාවයන් වර්ධනය කිරීමත් අරමුණු කර ගනමින් මෙම ව්‍යාපෘතිය ආරම්භ කර තිබේ.
එපමණක් නොව තොරතුරු තාක්ෂණ ක්ෂේත්‍රයේ රැකියා දස ලක්ෂයක් බිහි කිරීමේ ඉලක්කය ද ඇතිව මෙම ව්‍යාපෘතිය ආරම්භ කර තිබෙන බවත් හෙතෙම පවසයි.
මෙම ව්‍යාපෘතිය යටතේ ක්‍රියාත්මක පරිගණක පාඨමාලාවක වටිනාකම රුපියල් ලක්ෂ 25ක් වන බවත් එය සම්පූර්ණයෙන්ම නොමිලයේ දැයේ දූවා දරුවන් වෙත ලබාදීමට ඔහු විසින් කටයුතු කරන බවත් පවසා සිටියි.
වැඩිදුරටත් අදහස් දක්වමින් ධම්මික පෙරේරා මෙසේද පැවසීය.
“අපේ දුප්පත්කම නැති කරන්න පුළුවන් එකම එන්නත තමයි අධ්‍යාපනය. අපි අපේ දරුවන්ට නිවැරදි අධ්‍යාපනය ලබා දුන්නොත් අපේ දුප්පත් කම නැති කරන්න වැඩි කාලයක් යන්නේ නැහැ. අධ්‍යාපනයෙන් පොහොසත් වුණු කිසිම පවුලක් දුප්පත් නැහැ. මොකද කියනවනම් හරි අධ්‍යාපනය ලබා ගෙන තියෙනවනම් මුදල් හොයන්න ඕන තරම් මාර්ග ඒ අධ්‍යාපනය තුල තියෙන නිසා. ලංකාවටම එක හා සමානව ඉගෙන ගන්න පුලුවන් තැනැක් තමයි ඩී.පී. එඩියුකේෂන් කියන්නේ. ඒ අධ්‍යාපනය තියෙන්නේ අම්මගේ හෝ තාත්තගේ අතේ තියෙන ස්මාර්ට් ජංගම දුරකථනය තුල. ඒක හරියට පාවිච්චි කරන විදිය දැනගත්තනම් සියලුම විෂයන්ට අදාල ඉගැන්වීම් ඩී.පී. එඩියුකේෂන් යෙදවුම තුල තියෙනවා. ඩී.පී.එඩියුකේශන් එකේ උගන්වන්නේ ශ්‍රී ලංකාවෙ ඉන්න හොඳම ගුරුවරු කියලත් මම කියනවා. ඒවගේම මම අද මේ විවෘත කරන ඩී.පී. එඩියුකේෂන් අයි.ටී කැම්පස් වලින් ලෝකයට අවශ්‍ය දැනුම ඉගෙන ගන්න පුලුවන්. මේ එක් පාඨාමාලාවක් අවසන් කරන්න එක් අයෙකුත් රුපියල් ලක්ෂ 25ක් යනවා. ඒ ගානට කෙනෙක් පාඨමාලාවක් අවසන් කරනවා කියන්නේම ඒ පුතා හෝ දුව පොහොසත් කියන එකයි. එතකොට ඒවගේ දරුවෙක් ඉන්න පවුලක් දුප්පත් කියල අපිට සලකන්න බැහැ”
“ලෝකයේ දියුණු වුණු හැම රටක්ම අධ්‍යාපනයෙන් තමයි දියණු වෙලා තියෙන්නේ. මට තේරිල තියෙනව අධ්‍යාපනයෙන් තමයි රට ගොඩදාන්න පුලුවන් කියල. ඒකයි මම මගේ පෞද්ගලික ධනයෙන් දැයේ දුවා දරුවන්ට නොමිලයේම අධ්‍යාපනය ලබා දෙන්නේ. අධ්‍යාපනය නැමති කුළුණෙන් තමයි මේ රටේ ආර්ථිකය ගොඩ ගන්න පුලුවන් වෙන්නේ. අපි අධ්‍යාපනය කියනකොට පාසල් අධ්‍යාපනය ගැන විතරක් නෙවෙයි හිතන්න ඕන. පෙර පාසල් අධ්‍යාපනයත්, පිරිවෙන් අධ්‍යාපනය ඇතුළු අනෙකුත් අධ්‍යාපනය ගැනත් අපි හිතල වැඩ කරන්න ඕන. අධ්‍යාපනය නැමති මේ එන්නතෙන් අපේ ළමයින්වයි, රටයි ගොඩ ගන්න ක්‍රියාවලියට එකතු වෙන්න කියල මම ඉල්ලීමක් කරනවා” යනුවෙනි.
