එමෙන්ම මෙම ව්‍යාපෘති මැතිවරණය ඉලක්ක කර නොගෙන සාමාන්‍ය පරිදි සිදුකළ යුතු බවද මැතිවරණ කොමිෂන් සභාව කියයි.

යම් අයුරකින් මේ වැඩසටහන්වලට යම් පක්ෂයක දේශපාලනඥයන් සම්බන්ධ කරගත හොත් ඊට විරුද්ධව නීත්‍යානුකූල පියවර ගන්නා බවත්, එසේ වුවහොත් එය අදාල පකෂයේ ජනපතිවරණ අපේක්ෂකයාටද බලපෑ හැකි බවත් මැතිවරණ කොමිෂන් සභාවේ සභාපති ආර්.එම්.ඒ.එල්. රත්නායක පැවසීය.

රජයේ වැඩසටහන්වලට දේශපාලනඥයන් සම්බන්ධ කරගෙන දිගින් දිගට සිදු කරගෙන යන්නේ නම්, ඒවා පාලනය කිරීමට ක්‍රමවේදයක් සකස් කරන බවද සභාපතිවරයා පැවසුවේය.

මැතිවරණ කොමිෂන් සභාවේ මැතිවරණ පැමිණිලි භාර ගැනීමේ ඒකකය ජනාධිපතිවරණය ප්‍රකාශයට පත්කරන ලද දිනයේ සිටම විවෘත කර ඇතැයිද ඔහු කීවේය.

 මෙම අවස්ථාවේ පොලිස්පතිවරයෙකු රාජකාරියේ නිරතව නොසිටියද‍ එම දෙපාර්තමේන්තුවේ රාජකාරි කටයුතු සිදුකරගෙන යන බැවින්, මැතිවරණ කටයුතු සම්බන්ධව කටයුතු කිරීමට ජ්‍යෙෂ්ඨ නියෝජ්‍ය පොලිස්පතිවරයෙකු පත්කර තිබෙන බවත්, ඒ අනුව‍ මැතිවරණ කොමිෂන් සභාව ඔහු සමග අදාළ රාජකාරි කටයුතු කරගෙන යන බවද සභාපතිවරයා පැවසීය.

කෙසේ නමුත් පැෆරල් සංවිධානය විසින් මැතිවරණ කොමිෂන් සභාව විසින් යවන ලද පැමිණිල්ලකින් සඳහන් කර ඇත්තේ මෙමස 24 වැනි දින එනම් ජනාධිපතිවරණය ප්‍රකාශ කිරීමට පෙර දින අංක PS/CM/SB/318/2024 දරන කැබිනට් සංදේශය යටතේ උපාධිධාරීන් පනස් දහසක් බඳවා ගැනීමට ජනාධිපතිවරයා විසින් ආණ්ඩුකාරවරුන්ට බලය පවරා ඇති බවය.

2020 වර්ෂයේ ගනු ලැබූ කැබිනට් තීරණයක් වසර හතරක කාලයක් නොසලකා හරිමින් සිට ජනාධිපතිවරණය ප්‍රකාශයට පත් කිරීමෙන් අනතුරුව රැකියා පනස් දහසක් ප්‍රදානය කිරීමට ගනු ලබන මෙම උත්සාහය පැහැදිලි ලෙසම මැතිවරණය ඉලක්ක කරගෙන සිදු කරන බව පෙනී යන බවද අදාළ ලිපියේ සඳහන් වේ.

මේ අතර ඉඩම් අමාත්‍යාංශයේ ලේකම් සෝමරත්න විදානපතිරණ ජනාධිපති මාධ්‍ය කේන්ද්‍රයේ පසුගියදා පැවැති මාධ්‍ය හමුවකදී කියා සිටියේ උරුමය සින්නක්කර ඔප්පු ලබාදීමේ වැඩසටහන ප්‍රාදේශීය ලේකම් කාර්යාල මට්ටමින් සාමාන්‍ය පරිදි සිදු කරන බවත් මෙම වැඩසටහන මැතිවරණ සමයේ ක්‍රියාත්මක කිරීම පිළිබඳව මැතිවරණ කොමිෂන් සභාවෙන් උපදෙස් ලබාගන්නා බවය.

ජනාධිපතිවරයා තෝරාපත් කර ගැනීමේ ඡන්ද විමසීම එළැඹෙන සැප්තැම්බර් මස 21 වැනිදා පැවැත්වීම නියමිත බව මැතිවරණ කොමිෂන් සභාව අති විශේෂ ගැසට් පත්‍රයක් මගින්  (26 වැනිදා) දිනයේදී නිවේදනය කළේය.

වැඩි ඡන්දදායකින් ප්‍රමාණයකට ඡන්දය ප්‍රකාශ කිරීමට අවස්ථාව සැලසීම සඳහා සෙනසුරාදා දිනයක මැතිවරණය පැවැත්වීමට තෝරාගත් බවද සභාපතිවරයා පැවසුවේය.                                                                                                                                                                       - අරුණ