ඒ අනුව මෙරට වාහන ලක්ෂ 58 අතුරින් සියයට 20 ක්ම වායු විමෝචන මධ්‍යස්ථානවලදී අසමත් වන්නේ වාහන නිසි ලෙස නඩත්තු නොකිරීම නිසා බව ප්‍රවාහන රාජ්‍ය ඇමැති ලසන්ත අලගියවන්න පැවැසීය.
වායු විමෝචන මධ්‍යස්ථාන 464 ක් දිවයින පුරා ස්ථාපිත කර තිබෙන බවත්, ඇතැම් මධ්‍යස්ථානවලින් විවිධ වංචා කටයුතු සිදුවන බවට තොරතුරු අනාවරණයවීම නිසා එම මධ්‍යස්ථාන සී.සී.ටී.වී. කැමරාවලින් නිරීක්ෂණය කිරීමට කටයුතු යොදා ඇති බවත් ඇමැතිවරයා පැවැසීය.
තව මාස දෙකකින් වායු විමෝචන සහතික, රක්ෂණ සහතිකය සහ වාහන ආදායම් බලපත්‍රය එකම ස්ථාන දිවයින පුරා පිහිටුවීමට කටයුතු කරන බවත් මේ නිසා ජනතාවට වායු විමෝචන සහතිකය රැගෙන ස්ථාන කීපයකට යාමට අවශ්‍ය නොවන බවත් ඔහු කීවේය.
දිවයිනේ වායු දූෂණ තත්ත්වය නිරීක්ෂණය කිරීම සඳහා නගර 100 ක වායු තත්ත්ව නිරීක්ෂණ මාන සවි කිරීමට කටයුතු යොදා ඇතැයි ප්‍රවාහන රාජ්‍ය ඇමැති ලසන්ත අලගියවන්න පැවැසීය.
මේ වනවිට දිවයිනේ ස්ථාන 20 ක වායු තත්ත්වය නිරීක්ෂණය කෙරෙන බවද ඔහු කීවේය.
මෙහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද පැවසීය,
ප්‍රවාහන ක්ෂේත්‍රය නිසා ලෝකයේ මෙන්ම අප රටේ ද පරිසර පද්ධතියට හානි රැසක් සිදුවනවා. වාහනවලින් පිටවන දුමාරය ඒ අතර විශේෂයි. ඊට විසඳුමක් ලෙස අප විසින් දුම් සහතික නිකුත් කිරීම සිදු කරනවා. ඒ අනුව අප රටේ වායුගෝලයේ ගුණාත්මක භාවය හොඳ තත්ත්වයකින් පවත්වාගෙන යාමට සමත්ව තිබෙනවා. එමඟින් පෙනහළු ආශ්‍රිත රෝග අවම කිරීමට මෙම වැඩ පිළිවෙල සහාය වනවා.
ඒ වගේම ප්‍රවාහන අමාත්‍යාංශය, ගොඩනැගිලි පර්යේෂණ ආයතනය සහ මධ්‍යම පරිසර අධිකාරිය ඒකාබද්ධව ඉදිරි මාස හය ඇතුළත වායු විමෝචන තත්ත්වය මැන බැලීම සඳහා මධ්‍යස්ථාන සියය දක්වා වැඩි කිරීමට අවශ්‍ය ක්‍රියාමාර්ග ගෙන තිබෙනවා. මෙම දත්ත සියල්ලම එක් තැනකට ගෙන ලෝකයේ ඕනෑම තැනක සිට ඕනෑම පුරවැසියෙකුට සජීවිව අන්තර්ජාලය හරහා වායු විමෝචන තත්ත්වයන් බැලීම සඳහා අවශ්‍ය ක්‍රියාමාර්ග ගෙන තිබෙනවා.
එමෙන්ම වාහන වායු විමෝචන සහතිකය ලබාගැනීමෙන් පසු එම ස්ථානයෙන්ම රක්ෂණය සහ වාහන බලපත්‍රය ලබාගැනීම සඳහා අවශ්‍ය වැඩ පිළිවෙල සකස් කර තිබෙනවා. ඉදිරි මාස දෙක ඇතුළත එම වැඩපිළිවෙල දිවයින පුරා ක්‍රියාත්මක කිරීමට කටයුතු කර තිබෙනවා.
ජනාධිපති මාධ්‍ය කේන්ද්‍රයේ ඊයේ (05 වැනිදා) පැවැති මාධ්‍ය හමුවේදී ඔහු මේ බව කියා සිටියේය.
