මැතිවරණ කොමිෂන් සභාව මේ සතියේ රැස්වීමෙන් අනතුරුව ශ්‍රේෂ්ඨාධිකරණය විසින් ලබාදුන් නඩු තීන්දුවේ කරුණු මුලින්ම සාකච්ඡා කිරීමට බලාපොරොත්තු වන බවද ඔහු කීවේය. ඒ අනුව, පළාත් පාලන මැතිවරණය සම්බන්ධයෙන් ඉදිරි තීරණ ගන්නා බවද සභාපතිවරයා පැවසීය.
පළාත් පාලන මැතිවරණය ඉකුත් වසරේදී (2023) කල්යාම හේතුවෙන් මැතිවරණය සඳහා මුල් කාලයේදී කරන ලද වියදම් හැර අනෙක් මුදල් සියල්ල මහා භාණ්ඩාගාරයට යළි ප්‍රතිපූර්ණය වී ඇතැයිද ඔහු කීවේය.
මේ නිසා පළාත් පාලන මැතිවරණයට මුදල් ලබා ගැනීම සම්බන්ධයෙන් මුදල් අමාත්‍යාංශයේ ලේකම්වරයා සමග සාකච්ඡා කිරීමට බලාපොරොත්තුවන බවද සභාපතිවරයා සඳහන් කළේය. කෙසේ නමුත්, මෙම සියලු කාරණාවලට එළැඹීමට පෙර ශ්‍රේෂ්ඨාධිකරණ තීන්දුවේ කාරණා සම්බන්ධව කොමිසම සාකච්ඡා කළයුතු බවද ඔහු කීවේය.
ඉකුත් වසරේ (2023) මාර්තු මස 09 වැනිදා පැවැත්වීමට නියමිතව තිබූ පළාත් පාලන මැතිවරණයේ තැපැල් ඡන්දයට අදාළව ඡන්ද පත්‍රිකා කොටසක් රජයේ මුද්‍රණාලය විසින් මුද්‍රණය කර තිබූ අතර, එම තොගය එහි තවදුරටත් ගබඩා කර ඇතැයිද අනාවරණය වේ.
මුද්‍රණය නොකරන ලද ඉතිරි ඡන්ද පත්‍රිකා ප්‍රමාණය මුද්‍රණය කිරීමට හැකිවනු ඇතැයිද සභාපතිවරයා පැවැසීය. කෙසේ නමුත්, ඒ සම්බන්ධව මෙතෙක් සාකච්ඡාවක් සිදු නොකෙරුණු බවද ඔහු කීවේය.
පළාත් පාලන මැතිවරණයට තරග කිරීමට නාමයෝජනා ලබාදුන් ඇතැම් අපේක්ෂකයන් රට හැර යාම, ඇතැමුන් මියගොස් සිටීම, ඇතැමුන් දේශපාලනය අත්හැර දමා තිබීම යන කාරණා මත අලුතින් නාම යෝජනා කැඳවීම සම්බන්ධව රජයේ අවධානය යොමුවී ඇත.
මැතිවරණයට නාම යෝජනා භාරදුන් ඇතැම් දේශපාලන පක්ෂ හා ස්වාධීන කණ්ඩායම් මේ වනවිට නොමැති බවද අනාවරණය වේ.
අලුතින් නාම යෝජනා කැඳවීමේ හැකියාවක් පවතීද යන්න පිළිබඳ මැතිවරණ කොමිෂන් සභාව සමග සාකච්ඡා කර නීතිපතිවරයාගෙන් උපදෙස් ලබා ගැනීම පිළිබඳවද රජය අවධානය යොමුකර ඇත.
අලුතින් නාම යෝජනා කැඳවන්නේනම් ඒ සඳහා පාර්ලිමේන්තුවේ පනතක් සම්මත කරගත යුතුය.
