ඒ අනුව සෑම දිස්ත්‍රික්කයක්ම ආවරණය වන පරිදි අද (03 වැනිදා) දහවල් දෙළහේ සිට පස්වරු දෙක දක්වා පැය දෙකක කාලයක් වෛද්‍යවරුන් සේවයෙන් ඉවත්ව වෘත්තිය සමිති ක්‍රියාමාර්ගයේ නිරත වන බව එම සංගමයේ මාධ්‍ය ප්‍රකාශක වෛද්‍ය චමිල් විජේසිංහ පැවැසීය.
සෞඛ්‍ය පද්ධතිය තුළ සහ ඉන් පරිබාහිර පාර්ශ්වයන්ගේ මැදිහත් වීමෙන් වෛද්‍යවරුන් පීඩාවට සහ අධෛර්යයට පත් කිරීමේ අරමුණින් අඛණ්ඩව ක්‍රියාත්මක වන පටු න්‍යාය පත්‍ර සහ වැඩපිළිවෙළ වැළැක්වීමට දේශපාලන නායකත්වය, සෞඛ්‍ය බලධාරීන් ඇතුළු වගකිවයුත්තන් සාධනීය මැදිහත්වීම් නොකිරීම අවාසනාවන්ත තත්ත්වයක් බව එම සංගමය පෙන්වා දෙයි.
වෘත්තීය සමිති නායකයන්ට මාධ්‍ය ඉදිරියේ අදහස් දැක්වීමට ආයතන සංග්‍රහය තුළ අඩංගු නීතිමය ප්‍රතිපාදනවලට අනුකූලව, ඉතිහාසය පුරාම මෙරට සෞඛ්‍ය පද්ධතියේ ගැටලු සහ විෂමාචාර පිළිබඳව ජනතාව ඇතුළු පාර්ශ්ව දැනුවත් කිරීමට රජයේ වෛද්‍ය නිලධාරින්ගේ සංගමයේ කටයුතු කර තිබේ.
වැරදිකරුවන්ට දඬුවම් කිරීම පසෙකලා, වංචා දුෂණ සහ වැරදි පිළිබඳ තොරතුරු සපයන්නන් නිහඬ කිරීම ඉලක්ක කර ගනිමින්, සෞඛ්‍ය ක්ෂේත්‍රයේ ගැටලු පිළිබඳ ජනතාවට තොරතුරු හෙළි කරන වෘත්තීය සමිති නායකයන්ට එරෙහිව පිළිගත නොහැකි ලෙස අසාධාරණ සහ පක්ෂග්‍රාහි විනය පරීක්ෂණ ක්‍රියාත්මක කිරීමේ ප්‍රවණතාව අඩු වී නොමැති බව ද රජයේ වෛද්‍ය නිලධාරින්ගේ සංගමය සඳහන් කරයි.
වෘත්තීය සමිති නායකයකු ලෙස, 2022 වර්ෂයේ සැප්තැම්බර් මාසය වන විට බදුල්ල රෝහලේ තිබුණු ඖෂධ හිඟයත්, ඒ හරහා සෞඛ්‍ය සේවාවන්ට සිදුවන බලපෑමත් සම්බන්ධයෙන් මාධ්‍ය හරහා ජනතාවට තොරතුරු හෙළිදරව් කිරීම බරපතළ වැරැද්දක් සේ හුවා දක්වමින්, බදුල්ල ශික්ෂණ රෝහලට අනුයුක්තව සේවය කරන, රජයේ වෛද්‍ය නිලධාරීන්ගේ සංගමයේ සහකාර ලේකම් වෛද්‍ය පාලිත රාජපක්ෂට එරෙහිව ද අසාධාරණ සහ පක්ෂග්‍රාහි විනය පරීක්ෂණයක් ක්‍රියාත්මක කරමින් ඇති බවද රජයේ වෛද්‍ය නිලධාරින්ගේ සංගමය සඳහන් කරයි.
මෙහි මූලික විමර්ශනයේ සිටම මෙම පරීක්ෂණය පවත්වා ඇති ආකාරය පිළිබඳව ගැටලු ගණනාවක් ඇති අතර වෛද්‍ය පාලිත රාජපක්ෂට, වෘත්තිය සමිති නායකයකු ලෙස මාධ්‍ය ඉදිරියේ තම රාජකාරියට බාධා කරන ගැටලු පිළිබඳ අදහස් දැක්වීමට ඇති නීතිමය අයිතිය ද මෙම විමර්ශනය හරහා අහුරා දැමීමට උත්සාහ කර ඇති බව එම සංගමය පවසයි.
මෙම අසාධාරණ සහ පක්ෂග්‍රාහි විනය පරීක්ෂණය වහාම ඉවත් කර ගනිමින් වෛද්‍ය පාලිත රාජපක්ෂට සාධාරණය ඉටු කිරීමට සහ වෘත්තීය සමිති නායකයන්ට මාධ්‍ය ඉදිරියේ අදහස් දැක්වීමට ඇති අයිතිය තහවුරු කිරීමට මැදිහත් වන මෙන් සෞඛ්‍ය අමාත්‍යංශය ඇතුළු සියලු වගකිවයුතු බලධාරීන්ට මෙන්ම දේශපාලන නායකත්වයට ද දිගින් දිගටම ඉල්ලීම් කළත්, තවමත් ඒ සම්බන්ධයෙන් කිසිදු සාධනීය මැදිහත්වීමක් සිදුකරන බවක් පෙනෙන්නට නොමැති නිසා මෙම වෘත්තිය සමිති ක්‍රියාමාර්ගය ක්‍රියාත්මක කිරීමට කටයුතු කරන බව රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ වැඩිදුරටත් ප්‍රකාශ කරයි.
- අරුණ
