එම රෝහලේ මුළුතැන්ගෙයි සේවකයන් 14 දෙනකු සේවය කරන අතර ඉන් කිහිපදෙනෙකු එළවළු, මාළු, බිත්තර වැනි දේ නිවෙස් වෙත රැගෙන යන බවට තොරතුරු වාර්තා වීමත් සමග රෝහල් නියෝජ්‍ය අධ්‍යක්ෂ විශේෂඥ වෛද්‍ය ජයරුවන් බණ්ඩාර විසින් අභ්‍යන්තර විමර්ශනයක් සිදුකර තිබේ.
එලෙස සිදු කළ විමර්ශනයේදී අනාවරණය වී ඇත්තේ රෝහලේ නේවාසික රෝගීන් සඳහා ලැබෙන එළවළු ඇතුළු ආහාර ද්‍රව්‍ය සේවකයන් කිහිපදෙනෙකු විසින් සොරකම් කර නිවෙස් කරා රැගෙන යන බවටය.
සී.සී.ටී.වී දර්ශන හරහාද මේ බව තහවුරු කරගැනීමෙන් පසු වෛද්‍යවරයා විසින් පෙරේදා (11 වැනිදා) දින මුළුතැන්ගේ වැඩ පරීක්ෂක සහ අරක්ඇමියකු කැඳවා අවවාද කර තිබිණි.
එලෙස අවවාද කර පැය කිහිපයකට පසුව මුළුතැන්ගෙයි සේවකයන් තම කාර්යාලයට පැමිණ නොසන්සුන් ලෙස හැසිරුණු බව වෛද්‍යවරයා සඳහන් කළේය.
එලෙස පැමිණි ඇතැම් සේවකයන් තමාට පහරදීමට සැලසුම් කර තිබූ බවට තොරතුරු වාර්තා වූ බවද හෙතෙම කීවේය. පසුව වෛද්‍යවරයා ඔවුන් සිය කාර්යාලයෙන් පිටත් කර හැර ඒ පිළිබඳ රෝහල් අධ්‍යක්ෂකවරයා සහ සෞඛ්‍ය අමාත්‍යාංශය දැනුවත් කර තිබේ.
කෙසේ වෙතත් මීට පෙරද මෙහි සිදු වූ සොරකම් හේතුවෙන් සේවකයන් දෙදෙනෙකුට ස්ථාන මාරු ලබාදුන් බවත් එවැනි පියවරක් ගෙන තිබියදී නැවතත් එවැනි ක්‍රියාවන් සිදුවීම පිළිබඳව දැඩිව ක්‍රියාමාර්ග ගත යුතු බවත් නියෝජ්‍ය අධ්‍යක්ෂවරයා සඳහන් කළේය.
