එසේම එල්.ටී.ටී,ඊයත් ශ්‍රී ලංකා රජයත් අතර පැවැති සාමක්‍රියාවලිය ශක්තිමත් කර ගැනීමට තමන් කළ කැපවීම අගමැතිවරයා ලෙස එවකට මහින්ද රාජපක්ෂ මහතාගේ ඇගයීමට ලක්වූ බවද සොල්හයිම් පවසයි.
ඔහු මේ බව අවධාරණය කරන්නේ ජනපති මහින්ද රාජපක්ෂ මහතා විසින් පසුගියදා කුරුණෑගල පැවැති ජනහමුවකදී කළ ප්‍රකාශයකට ප්‍රතිචාර වශයෙනි.
නෝර්වේ විසින් එල්.ටී.ටී,ඊයට මුදල් දුන් බවට ජනපති මහින්ද රාජපක්ෂ මහතා එම ජනහමුවේදී චෝදනා කළ අතර ඊට පිළිතුරු ලෙස නෝර්වේ හිටපු සාම නියෝජිතයා ප්‍රකාශ කර තිබුණේ මැතිවරණය ඉලක්ක කර ජනපති බොරු කියන බවකි.
ජනාධිපතිවරයාගේ එම චෝදනාවට තමන් යළි පිළිතුරු ලබාදෙන බව ට්විටර් පණිවිඩයක් මගින් සොල්හයිම් සඳහන් කර තිබිණ.
ඒ අනූව ජනාධිපතිවරයා විසින් කළ එම චෝදනාව ප්‍රතික්ෂේප කරමින් ඔහු ඊයේ නිවේදනයක් නිකුත් කර තිබේ.
එම නිවේදනයේ දැක්වෙන්නේ එල්.ටී.ටී.ඊ සංවිධානයට කිසිසේත් මූදල් නොදුන් බවත්, ශ්‍රී ලංකා රජයත් එල්.ටී.ටී,ඊයත් අතර එවකට පැවැති සාම ක්‍රියාවලිය වඩාත් ශක්තිමත් කර ගැනීම සඳහා එල්.ටී.ටී,ඊ සාම ලේකම් කාර්යාලයට ආර්ථික සහන ලබාදුන් බවය.
මෙය වත්මන් ජනපතිවරයා එවකට අගමැතිවරයා ලෙස දැනුවත්ව සිටි බවත්, සාම ක්‍රියාවලිය සාර්ථක කර ගැනීම සඳහා නෝර්වේ රාජ්‍ය කරන කැපවීම එහිදී ඔහුගේ පැසසුමට ලක්වූ බවත් සොල්හයිම් පෙන්වාදෙයි.
ඒ යටතේ එල්.ටී.ටී,ඊ සාම ලේකම් කාර්යාලයට අවශ්‍ය විදුලි සම්ප්‍රේෂණ උපකරණ ඇතුළු ද්‍රව්‍ය මිලදී ගැනීමට අවශ්‍ය ආර්ථික සහන ලබාදුන් බවත් එය කිසිසේත් යුද්ධය සඳහා දුන් මූල්‍යාධාරයක් නොවන අතර එම කටයුතු සිදුකළේ සම්පූර්ණ විනිවිද භාවයකින් යුතුව බව ඔහු අවධාරණය කරයි.
විශේෂයෙන් එල්.ටී.ටී,ඊය සමග සාම ක්‍රියාවලිය ගැන මහින්ද රාජපක්ෂ මහතා නෝර්වේ රාජ්‍යයේ කැපවීම අගය කරමින් එම ක්‍රියාවලියේ ප්‍රගතිය ගැන දැනුවත් කරන්නැයි තමන්ට පවසා ඇති අතරම එම කටයුතුවලදී තමාගේ මැදිහත්වීම ඔහු පෞද්ගලිකවම ඇගයීමකට ලක් කළේ යැයිද සොල්හයිම් සිය නිවේදනය මගින් වැඩිදුරටත් කියා සිටියේය.
