වෙඩිතැබීමෙන් තුවාල ලැබූ එක්සත් ජාතික පක්ෂයේ හිටපු බේරුවල ප්‍රාදේශීය සභා මන්ත්‍රීවරයකු වන චමිල රණසිංහ කළුතර රෝහලට ඇතුලත් කිරීමෙන් අනතුරුව කොළඹ මහ රෝහලට මාරුකොට යවා තිබේ.
අසාධ්‍ය තත්වයෙන් පසුවන ඔහු දැඩි සත්කාර ඒකකයට ඇතුලත් කොට ඇති බවත් වාර්තාවේ.
රතිඤඤා පත්තු කරමින් සිටි විපක්ෂ ආධාරකරුවන් දෙසට මෝටර් රථයකින් පැමිණි හඳුනා නොගත් කණ්ඩායමක් වෙඩි තබා පලාගොස් ඇති බවත් පොලිසිය පවසයි
අලවතුවලට මාවතගම දී ප්‍රහාරයක්
වයඹ පළාත් සභා මන්ත්‍රී සහ විපක්ෂ නායක ජේ.සී.අලවතුවල මහතා එජාප ආධාරකරුවන් පිරිසක් සමග රථ පෙළපාලියකින් ගමන් කරන අතර මාවතගම දී ප්‍රහාරයකට ලක්ව ඇත.
ප්‍රහාරයෙන් වාහන 4 කට හානි සිදුව ඇත. ප්‍රහාරය මෙහෙයවා ඇත්තේ මාවතගම ප්‍රා දේශීය දේශපාලනඥයෙකු සහ පසුගිය වයඹ පළාත් සභා මැතිවරණයේ දී ද ප්‍රචණ්ඩක්‍රියා ගණනාවක් සිදුකළ පළාත් පාලන ආයතන නියෝජිතයෙකු විසින් මෙහෙයවු කණ්ඩායමක් විසිනි.
ප්‍රහාරයෙන් පුද්ගලයින් දෙදෙනෙකුට තුවාල සිදු ව ඇත. එජාප ප්‍රාදේශීය සභා මන්ත්‍රී සුපසන් තුවාල හේතුවෙන් කුරුණෑගල මහ රෝහලට ඇතුලත් කොට ඇත.
ජනාධිපතිවරණය ප්‍රකාශයට පත්වීමත් සමගම නිදහසේ සිය ප්‍රීතිය බුක්ති විදීමට පසුගිය 20 දින එක්සත් ජනතා නිදහස් සන්ධානයේ වත්මන් ජනාධිපතිවරයාට සහාය පළ කරන පිරිසට අවස්ථාව ලැබුණි.
තමන් කැමති අපේක්ෂකයෙකු වෙනුවෙන් සතුට පළ කිරීමට අවස්ථාව යම් පිරිසකට අහිමි කිරීම අදහස් ප්‍රකාශ කිරීමේ නිදහසට බාධා කිරීමකි.
ඡනාධිපතිවරණය ප්‍රකාශයට පත්වීමත් සමගම ප්‍රචණ්ඩක්‍රියා වාර්තාවීම පිළිබද 'කැෆේ' සංවිධානය දැඩි කනස්සල්ල පළ කරයි.
